رادیۆی دەنگ

 

دوای ئەوەی بەڕێوبەرایەتی ئاودێریی گەرمیان مەرەزەی لە سنورەكە قەدەغەكرد بەهۆی کەمئاوییەوە، بەڵام سەرەڕای ئەوەش لە چەند پڕۆژەیەكی ئاودێرییدا مەرەزە كراوە، بەڕێوبەری ئاودێری گەرمیانیش دەڵێت: سكاڵامان لەسەر تۆماركردون و چاوەڕێی بڕیاری دادگاین.

 

موئەیەد ئەحمەد، بەڕێوبەری بەڕێوبەرایەتی ئاودێریی گەرمیان، بە رادیۆی دەنگی وت: لە  دادگا سكاڵامان تۆماركردوە لەو جوتیارانەی كە مەرەزەیان كردوە، چونكە بە زیادەڕەویی هەژماردەكرێت.

 

دەشڵێت: ئەو كەسانەی مەرەزەیان لەسەر پڕۆژە ئاودێرییەكان كردوە زیادەڕەوییە، بەڵام ئەگەر لەسەر سیروان بێت گرفتی نییە.

 

باسی لەوەشكرد: لەم هەفتەیەدا لە دادگا سكاڵاكانیان یەكلادەبێتەوە و دەبێت یان ئەو مەرەزەیە وشك بكرێتەوە یانیش ئەگەر بەپێی یاسای پاراستنی ئاو مامەڵەی لەگەڵدا بكرێت ئەوكاتە غەرامەكەی زۆرە و زیندانیكردنیشی تێدایە.

 

رۆژی 5ـی حوزەیرانی ئەمساڵ، بەڕێوبەرایەتی ئاودێریی گەرمیان لە راگەیەنراوێکدا ئاشکرای کرد مەرەزەکردن و چاندنی گەنمە شامی لەسەر هەریەکە لە پڕۆژە ئاودێریەکانی (باڵەجۆ، شێخ لەنگەر و سەلام) بە هەمو جۆرێک قەدەغەیە.

 

باسی لەوەشکردوە: ئەم بڕیارە بەهۆی دابەزینی ئاستی ئاوی روباری سیروانەوە دراوە کە پێداویستی تەواوی ناوچەکان پڕناکاتەوە.