رادیۆی ده‌نگ

 

لێرەدا پوختەیەکی گشتگیر لە دوایین پێشهاتەکانی (دوێنێ و بەیانی ئەمڕۆ ١٧ـی حوزەیرانی ٢٠٢٥) لە شەڕی نێوان ئیسرائیل و ئێران، بە پشتبەستن بە سەرچاوەی باوەڕپێکراو دەخەینەڕو:

 

* سەرلەبەیانی ئەمڕۆ، ئێران سێ گوژمە درۆن و موشەکی ئاراستەی تەلئەبیب کرد، لە ئەنجامدا ژمارەیەک هاوڵاتی برینداربون (بەپێی زانیارییەکان تائێستا ١٥ کەسن) و ژمارەیەکی تر لە ژێر داروپەردودا گیریان خواردوە.

 

* هێرشە ئاسمانییەکانی ئیسرائیل دوێنێ تارانیان کردە ئامانج، لەوانە: لێدان لە باڵەخانە حکومییەکان و دامەزراوەکانی سوپای پاسداران لە پایتەخت، لەگەڵ ستۆدیۆی تەلەفزیۆنی حکومیی.

ئەم بەیانییەش بەردەوام بون لە موشەکبارانکردنی چەند ناوچەیەکی جیاوازی تاران و تەورێز.

 

* ئێران دەڵێت رێگری لە ژمارەیەک درۆنی ئیسرائیلی کردوە و خستونیەتییە خوارەوە، لەنێویاندا دانەیەک ئەم بەیانییە لە پێگەی ئەتۆمی "نەتەنز".

 

* ئیسرائیل رایدەگەیەنێت سەرۆکی تازە دانراوی ئەرکانی سوپای ئێران: عەلی شادمانی، لە گورزێکی موشەکیدا کوشتوە.

 

* لەسەرەتای شەڕەکەوە، بەپێی ئامارەکانی وەزارەتی تەندروستی ئێران نزیکەی ٢٢٤ کەس گیانیان لەدەستداوە. لە ئیسرائیلیش ٢٤ کەس کوژراون، ئەمە سەرباری سەدان بریندار لە هەردولا. بەشێکی زۆری قوربانییەکان کەسانی مەدەنین و لەنێویاندا مناڵ.

 

* ئیسرائیل ڕایگەیاند کە توانیویەتی سێیەکی سەکۆی موشەکی بالیستی ئێران (زیاتر لە ١٢٠ سەکۆ) لەناوببات.

 

* سەرۆکی ئاژانسی وزەی ئەتۆمی نێوده‌وڵه‌تى، دەڵێت: ئامێرەکانی سەنتەرفیوجی پێگەی ئەتۆمی 'نەتەنز' زیانی زۆریان بەرکەوتوە ئەگەر بەتەواوی لەناونەچوبن.

 

* ئێران هەڕەشەدەکات کە لە پەیماننامەی قەدەغەکردنی بڵاوبونەوەی چەکی ئەتۆمی دەکشێتەوە، ئەگەر هێرشەکان رانەگیرێن.

 

* بەهەزاران کەس لە دانیشتوان، تارانی پایتەخت بەجێدەهێڵن لە کاتێکدا کە ئیسرائیل هۆشدارییەکانی چۆڵکردن و داخستنی دوکانەکانی داوە.

 

* وڵاتانی زلهێزی (G7)، پشتیوانی لە ئیسرائیل دەکەن لە "مافی بەرگری لەخۆکردن"، لەهەمانکاتدا داوای دانبەخۆداگرتن و دەستپێکردنەوەی دیالۆگی ئەتۆمی دەکەن.

 

* سەرۆکی ئەمریکا ترەمپ داوای چۆڵکردنی تاران و راگرتنی دانوستانە ئەتۆمییەکان لە گەڵ ئێران دەکات.