رادیۆی دەنگ

 

سیستەمی بە ئەلیكترۆنی كردنی فۆڕمی خۆراك لە گەرمیان گرفتی تێدایە، بەڕێوبەری خۆراكی گەرمیانیش دەڵێت: ئەو كەسانە لە دو ساڵی رابردودا وەکیلیان گۆڕیوە، گرفتیان بۆ دروست بوە.

 

حکومەتی عێراقی فۆرمی خۆراکی مانگانەی کردوە بە ئەلیکترۆنی و لە رێگەی ئەپێکەوە زانیارییەکان تۆماردەکرێن، ئەم پرۆسەیە پێشتر لە پارێزگاکانی تر کراوە و لەئێستاشدا بۆ پارێزگاکانی هەرێم بەردەستخراوە.

 

بەوتەی چەند هاوڵاتییەک کە قسەیان بۆ رادیۆی دەنگ کرد، لە تۆمارە ئەلیکترۆنییەکەدا کە ئەپێکی مۆبایلە، ناوەکانیان تۆمارناکرێت ئەگەرچی فۆرمی کاغەزیی خۆراکیان هەیە و مانگانەش بەشە خۆراک وەردەگرن.

 

لەوبارەیەوە، نوریە عەبدولحەمید، بەڕێوبەری بەڕێوبەرایەتی خۆراكی گەرمیان، بە رادیۆی دەنگی وت: سیستەمەكە لە گەرمیان چوەتە بواری جێبەجێكردنەوە و لە قۆناغی یەكەمدا تەنها ناوی ئامادەبوان داخل دەكرێت و ئەوانەی كە لە دەرەوەی وڵاتن یاخود ئەوانەی جیابونەتەوە یان كارتی نیشتمانیان نییە، داخل ناکرێن.

 

لەبارەی گرفتی داخلبونی بەرنامەكەشەوە کە هەندێک هاوڵاتی هەیانە، وتی: گرفتە سەرەكیەكە ئەوەیە كەسانێك لە ماوەی دو ساڵی رابردودا وەكیلەكەیان گۆڕیوە و كاتێك داخلی دەكات كێشەی بۆ دروستدەبێت، بۆ چارەسەری ئەمەش دەتوانێت سەردانی بەڕێوبەرایەتیمان بكات.

 

بەوتەی ئەو بەڕێوبەرە، لەم قۆناغەدا تەنها ناوە ئامادەکان داخل دەکرێن و ئەو مناڵانەی لەماوەی دو ساڵی رابردودا هاتونەتە دونیاوە، داخل ناکرێن و لە قۆناغەکانی تردا ئەوان دەگرێتەوە.