رادیۆی دەنگ

 

بەوتەی بەڕێوبەری سایلۆی کەلار، لە چەند رۆژی داهاتودا دەست بە وەرگرتنی دانەوێڵە لە جوتیارانی سنورەکە دەکەن، دەشڵێت: بڕیارە نزیکەی 40 هەزار تۆن گەنم وەربگرین.

 

کاروان رەئوف، بەڕێوبەری سایلۆی کەلار "گەرمیان"، بە رادیۆی دەنگی وت: هەمو ئامادەکارییەکمان کردوە و چاوەڕوانی بڕیاری وەرگرتنی دانەوێڵە بوین و بڕیارەکەش لە وەزارەتەوە دەرچوە کە لە 10ـی ئەم مانگەوە دەستبکەین بە وەرگرتنی دانەوێڵەی ئەم وەرزە.

 

دەشڵێت: بڕیارە نزیکەی 40 هەزار تۆن گەنم وەربگرین، بۆ ئەمساڵیش گرفتی وەرگرتنی گەنممان نیە، چونکە توانای عەمبارکردنی 65 هەزار تۆنمان هەیە و بە ئاسانی دەتوانین کۆنتڕۆڵی بکەین.

 

نزیکەی چوار ساڵە سایلۆی کەلار "گەرمیان" کارەکانی تەواوبوە و بەهۆی نەبونی کارمەندەوە بەوشێوەیە مابویەوە و لە ئێستادا 58 کارمەندی بۆ دامەزراوە و بڕیارە ئەمساڵ بۆ یەکەمجار گەنمی جوتیارانی سنورەکە لە سایلۆکانیدا وەربگرێت، کە پێشتر تەنها وەکو بنکەیەکی وەرگرتنی دانەوێڵە بو و بەرهەمی دانەوێڵە لە دەرەوە و لەناو حەوشەی سایلۆکەدا دادەنرا و دواتر دەگوازرایەوە سایلۆکانی دیکە.