رادیۆی دەنگ

 

لە ناحیەی رزگاریی سەر بە کەلار ۱٥ سەر ئاژەڵ بە ڤایرۆسێک مرداربونەوە، بەڕێوبەری ڤێتەرنەری رزگارییش دەڵێت: تەنها ئاژەڵە قاچاخەکان توشی ئەم ڤایرۆسە دەبێت.

 

سۆران خەلیل، بەڕێوبەری ڤێتەرنەری رزگاریی، بەرادیۆی دەنگی راگەیاند:  15 سەر ئاژەڵ لە جۆری گوێرەکە مرداربونەتەوە، قسەمان لەگەڵ شارەوانی کردوە و لەچاڵمان ناون.

 

رونیکردەوە: ئەم ڤایرۆسە داویەتی لەو ئاژەڵانە پێی دەڵێن "تەبەق"، ڤایرۆسەکە دەدات لە دڵی ئاژەڵەکە وەکو جەڵدەیەکە و دڵی دەوەستێنێت، توشی ئاژەڵی بچوک دەبێت وەکو گوێرەکە، بەرخ و کار و دەیانکوژێت، ئەژەڵانی دیکەش توش دەبن، بەڵام بە دەرزیی چارەسەر دەبن.

 

وتیشی: نزیکەی سێ مانگە ئەم نەخۆشییە هەیە و بڵاوبوەتەوە، توشی ئاژەڵی خۆماڵی نابێت وەکو عەرەبی و کوردی، تەنها توشی ئاژەڵی بە قاچاخ هاتو دێت وەک جۆرجی و بەڕازیلی و چەند جۆرێکی تر.

 

باسی لەوەشکرد: ئەم ئاژەڵانە بەقاچاخ دێن، لەسەر ئاستی وەزارەت هاوردەکردنیان قەدەغەکراوە، بەڵام هیچ رێکارێک نەگیراوەتەبەر و رێگری نەکراوە.

 

ئەمەش لەکاتێکدایە کە چەند حاڵەتێکی نەخۆشی تای خوێنبەربون لە ناوچەکانی دەوروبەری گەرمیان وەکو پارێزگاکانی کەرکوک و دیالە بڵاوبونەتەوە.

 

لەبارەی پەیوەندی تای خوێنبەربون بە نەخۆشی تەبەقەوە، بەڕێوبەری ڤێتەرنەری رزگاریی وتی: ئەم ڤایرۆسە پەیوەندی بە تای خوێنبەربونەوە نییە و ناگوێزرێتەوە بۆ مرۆڤ، بەڵکو تەنها لە ئاژەڵەوە بۆ ئاژەڵ دەگوازرێتەوە.