رادیۆی دەنگ

 

له‌ به‌شێكى فه‌رمانگه‌كانى گه‌رمیان كۆتایی هه‌فته‌كان به‌ڕێوبه‌ران كردویانه‌ به‌ پشو بۆ خۆیان و ده‌وام ناكه‌ن، ئیداره‌ى گه‌رمیانیش ده‌ڵێت: ئیجرائات ده‌كه‌ین.

 

به‌پێى به‌دواداچونه‌كانى رادیۆى ده‌نگ، له‌ به‌شێكى زۆرى فه‌رمانگه‌ حكومیه‌كان رۆژانى پێنچ شه‌مان كه‌مترین به‌ڕێوبه‌ر له‌سه‌ر كارده‌بن و ده‌وام ناكه‌ن، یاخود ئه‌وانه‌شى ده‌وام ده‌كه‌ن له‌ دواى كاتژمێر نۆى به‌یانى ده‌رۆنه‌ سه‌ركار، له‌ كاتێكدا به‌پێى یاسا و رێنماییه‌كان له‌ كاتژمێر 8:30 خوله‌ك ده‌وام ده‌ستپێده‌كات له‌ 2:30 خوله‌ك كۆتایی دێت.

 

له‌به‌رامبه‌ردا، چۆمان ئه‌حمه‌د، به‌رپرسى راگه‌یاندن و په‌یوه‌ندیه‌كانى ئیداره‌ى گه‌رمیان، بۆ رادیۆى ده‌نگ وتى: به‌پێى یاسا و رێنماییه‌كان، كاتى ده‌وامى فه‌رمانگه‌ حكومیه‌كان رێكخراوه‌ له‌ كاتژمێر 8:30ـی بەیانی بۆ 2:30ـی دوانیوه‌ڕۆ.

 

وتیشى: به‌ڕێوبه‌رى فه‌رمانگه‌كان ده‌بێت پابه‌ندبن به‌ ده‌وامه‌وە و هیچ رۆژێكیان بۆ دیاریینه‌كراوه‌ پشو بێت، له‌ ئه‌گه‌رى نه‌هاتنیش ده‌بێت مۆڵه‌ت بكەن یان كه‌سێك له‌ جێگه‌ى خۆى دابنێن بۆ راییكردنى مامه‌ڵه‌ى هاوڵاتیان.

 

جه‌ختى له‌وه‌شكرده‌وه‌: هه‌ر به‌ڕێوبه‌رێكیش پابه‌ند نه‌بێت به‌ ده‌وامى ته‌واوى رۆژه‌كانى هه‌فته‌، ئه‌وه‌ لیژنه‌یه‌كى چاودێریی و به‌دواداچونمان هه‌یه‌ له‌ ئیداره‌ى گه‌رمیان، به‌پێى یاسا و رێنماییه‌كان ئیجرائاتى خۆى ده‌كات.