رادیۆی دەنگ

 

دواى ئه‌وه‌ى چالاكوانێك رایگه‌یاند کۆمپانیا‌ کەمتەرخەمی لەکاری زۆنه‌كانى سه‌ر روبارى سیروان دەکات و ده‌یه‌وێت ڤێلاكانى خۆى ته‌واو بكات و كۆرنیشەکەش وازیلێهێنراوه‌، بەڕێوبەرایەتی وه‌به‌رهێنانى گه‌رمیان ده‌ڵێت: ئه‌گه‌ر كۆمپانیا شتى وا بكات پرۆژه‌كه‌ى هه‌ڵده‌وه‌شێنرێته‌وه‌.

 

ئه‌یاد محه‌مه‌د، چالاكوان له‌ گه‌رمیان، له‌ لێدوانێكیدا بۆ رادیۆى ده‌نگ باسى له‌وه‌كرد: كه‌مته‌رخه‌مى ده‌كرێت له‌ پرۆژه‌كه‌ى سه‌ر روبارى سیروان، كۆمپانیا ده‌یه‌وێت ڤێلاكانى خۆى ته‌واو بكات و كۆرنیشه‌كه‌ش وازى لێهێنراوه‌ و کاری پێویستی تێداناکرێت.

 

له‌ به‌رامبه‌ردا، چۆمان فه‌لاح، وته‌بێژى به‌ڕێوبه‌رایه‌تى گشتى وه‌به‌رهێنانى گه‌رمیان، بۆ رادیۆى ده‌نگ ده‌ڵێت: له‌ پرۆژه‌ى زۆنه‌كانى سه‌ر روبارى سیروان كۆمپانیا له‌به‌رامبه‌ر ته‌واوكردنى كۆڕنیشه‌كه‌د زه‌وى پێدراوه‌، ئه‌گه‌ر بێت و كارى له‌سه‌ر نه‌كات ئه‌وه‌ وه‌به‌رهێنان له‌ توانایدا هه‌یه‌كاره‌كانى رابگرێت.

 

ده‌شڵێت: هاوكات ئه‌گه‌ر بێت و كۆمپانیا واز له‌ كۆڕنیشه‌كه‌ بهێنێت ئه‌وه‌ دواى ٣ جار ئاگاداركردنه‌وه‌، وه‌به‌رهێنان له‌ ده‌سه‌ڵاتیدا هه‌یه‌ پرۆژه‌كه‌ هه‌ڵبوەشێنێته‌وه‌، به‌ڵام تاوه‌كو ئێستاكۆمپانیاش به‌ فه‌رمى راینه‌گه‌یاندوه‌ كه‌ كۆڕنیشه‌كه‌ ته‌واو ناكات.

 

هێمای بۆ ئه‌وه‌شكرد: چاودێرى ده‌كه‌ین و به‌دواداچونى بۆ ده‌كه‌ین، له‌ بونى هه‌ر ئه‌گه‌رێك ئه‌وه‌ى له‌ ده‌سه‌ڵاتى وه‌به‌رهێنان بێت ئیجارائاتی خۆى ده‌كات.