رادیۆی دەنگ

 

بەڕێوبەرایەتی رێگاوبانى گه‌رمیان ئاشکرای دەکات كاره‌كانى رێگه‌ى كه‌لار- ده‌ربه‌ندیخان ١٪ـی ماوە بۆ ته‌واو بون‌، دیارترین بەشی تەواونەبوی رێگاکەش لەلای گوندی ئاوەخێرییە.

 

لە داواکارییەکدا کە‌ هاوڵاتییەک بۆ رادیۆی دەنگی ناردوە، باس لەوەدەکات رێگاى نێوان که‌لار-ده‌ربه‌ندیخان بەتایبەت له‌ گوندى ئاوه‌خێرى کارکردن تیایدا ماوە، ئەویش زۆرینەی كارەکانی ته‌واو بوه‌ و ته‌نها كراش و قیرى ماوه‌، کەچی کارەکانی وه‌ستاوه‌، ئەمەش وایکردوە ئاستەنگ بۆ گوندنشینان دروستبێت و چێشتخانه‌یه‌كیش کە له‌سه‌ر رێگاکەیە بەداخراوی بمێنێتەوە و کرێکارەکانی بێئیش بن.

 

له‌ به‌رامبه‌ردا، عه‌دنان خه‌لیل، به‌ڕێوبه‌رى به‌ڕێوبه‌رایه‌تى رێگاوبانى گه‌رمیان، بۆ رادیۆى ده‌نگ وتی: ئه‌و شوێنه‌ تەنها كراش و قیرى نه‌ماوە وەک باس دەکرێت، بەڵکو ‌كارى ترى ماوه‌.

 

جەختیشیکردەوە: كاركردن له‌ رێگاكه‌ نه‌وه‌ستاوه‌، به‌ڵكو به‌هۆى دۆخی كه‌شوهه‌واوه‌ كاره‌كانى به‌ خاوى ده‌ڕوات.

 

ده‌شڵێت: رێگه‌كه‌ ٩٩٪ کارەکانی ته‌واو بوه‌، لەسەرەتای ساڵیشەوە هه‌ردو سایده‌كه‌ كراوه‌ته‌وه‌ به‌ڕوى هاوڵاتیاندا، تەنها چه‌ند كیلۆمه‌ترێك نه‌بێت هه‌ندێك كارى ماوه‌، ئه‌وه‌ش بەمزوانە ته‌واو ده‌كرێت.