دەنگ نێت

 

شۆفێرانی ئۆتۆمبیلی بارهەڵگری "کەپس" لە دەروازەی پەروێزخان گردبونەوە و ناڕەزایەتی دەردەبڕن و دەڵێن ناهێڵن ئیش بکەین.

 

شۆفێرێکی دەروازەکە کە نەیویست ناوی بهێنرێت، بە رادیۆی دەنگی وت: ئێمەی شۆفێرانی ئۆتۆمبیلە کەپسەکان بە هەردو هێڵی باکور و باشور نزیکەی ٤٠٠ شۆفێرین، لە رۆژێکدا ١٥-٢٠ بارمان هەیە.

 

وتیشی: ئێستا لە ئێرانەوە جۆرێک باردەهێنرێت بەناوی ترانزێت و باری شوشەواتەوە کە نابێت ئۆتۆمبیلەکەی بگۆڕدرێت و لە رۆژێکدا ٣٠ بۆ ٤٠ بار بەم ناوەوە دێت.

 

باسی لەوەشکرد ئەو ئۆتۆمبیلانەی ئەم بارانە دەهێنن هێڵیان نییە و بە پارەیەکی کەم ئەم کارە دەکەن، لەکاتێکدا ئەوان کە خاوەن هێڵن بێکارن و مانگی کاروانێک یان دوان دەکەن.

 

ئاماژەی بەوەشدا ئەوان گردبونەوەیان کردوە و ئامانجیانە کە بەرپرسان بەدەمیانەوە بێن و مافیان پێبدەن، وتیشی: تائێستا تەنها گردبوینەتەوە و چاوەڕێی وەڵامین و بەپێی وەڵامەکە هەنگاوی دیکەمان دەبێت.