دەنگ نێت

 

به‌هۆى خه‌رجنه‌كردنى موچه‌وه‌، بازنه‌ى بایكۆتكردن له‌ گه‌رمیان تا دێت فراوانتر ده‌بێت، به‌شێك له‌ مامۆستایانى سنوره‌كه‌ش بڕیاریانداوه‌ نه‌گه‌ڕێنه‌وه‌ ناوه‌نده‌كانى خوێندن، ئه‌ندامێكى ئه‌نجومه‌نى مامۆستایانى ناڕازیش ده‌ڵێت: پێویسته‌ مامۆستایان واژو كۆبكه‌نه‌وه‌ بۆ بایكۆت کردن‌.

 

به‌پێى زانیارییه‌كانى رادیۆى ده‌نگ، لە دوێنێوە لە هەندێک لە فەرمانگەکانی سنورەکە بەتایبەتی نەخۆشخانە و مەڵبەند و ناوەندە تەندروستییەکان، بایکۆتی دەوام دەستیپێکردوە.

 

هاوکات هه‌ندێك له‌ مامۆستایان به‌هۆى خه‌رجنه‌كردنى موچه‌كانیان بڕیاریانداوه‌ نه‌گه‌ڕێنه‌وه‌ ناوه‌نده‌كانى خوێندن.

 

نه‌به‌رد ئه‌حمه‌د، ئه‌ندامى ئه‌نجومه‌نى مامۆستایانى ناڕازیی له‌ گه‌رمیان، بۆ رادیۆى ده‌نگ وتى: بایكۆتكردنى ناوه‌نده‌كانى خوێندن یه‌كێکە له‌ رێگه‌ كاریگه‌ره‌كان بۆ به‌ده‌ستهێنانى مافه‌كانمان، بۆ ئه‌و مه‌به‌سته‌ش پێویسته‌ مامۆستایان بۆ خۆیان واژۆ كۆبكه‌نه‌وه‌ و بڕیارى خۆیان هەبێت كه‌ بایكۆت بكەن‌، ئێمه‌ش هاوكار و هه‌ماهه‌نگ ده‌بین.

 

ده‌شڵێت: پێویست ناكات مامۆستا چاوه‌ڕوانى بڕیارى ئه‌نجومه‌نى مامۆستایانى ناڕازیی بێت، پێویسته‌ خۆیان بڕیار بده‌ن و ده‌ستپێشخه‌رى بكه‌ن بۆ ئه‌و بابه‌ته‌.

 

بایكۆتكردنى ده‌وام له‌لایه‌ن فەرمانبەرانەوە له‌ كاتێكدایه‌ کە ماوه‌ى زیاتر له‌ ٢ مانگه‌ موچه‌خۆرانى هه‌رێم موچه‌یان بۆ خه‌رجنه‌كراوه‌ و دیاریش نییە‌ حكومه‌ت كه‌ى ده‌ست به‌ دابه‌شكردنى موچه‌ ده‌كات.