دەنگ نێت

 

بۆ ماوه‌ى ١١ ساڵه‌ شوێنه‌واره‌كانى گه‌رمیان كاركردن تێیاندا راگیراوه‌، به‌ڕێوبه‌رى شوێنه‌وارى گه‌رمیانیش ده‌ڵێت: شوێنه‌واره‌كانى گه‌رمیان له‌ ئه‌وله‌ویه‌تى كارى حكومه‌تدا نیه‌.

 

لەنێو پرۆژە حکومییە راگیراوەکانی سنوری گەرمیاندا، ٢ پرۆژە لە بواری شوێنەواردا هەن، کە بریتین لە نۆژەنکردنەوەی بازاڕ و قەیسەری کفری و  نۆژەنکردنەوەی کۆشکی مەحمودپاشا.

 

ساڵح محه‌مه‌د سه‌مین، به‌ڕێوبه‌رى به‌ڕێوبه‌رایه‌تى شوێنه‌وارى گه‌رمیان باس له‌وه‌ده‌كات: له‌ ساڵى ٢٠١٣ـەوە‌ ئه‌و پرۆژانه‌ى ئێمه‌ ده‌رچوه‌ بۆ ئه‌وه‌ى كارى له‌سه‌ر بكرێت، به‌ڵام به‌هۆى قه‌یرانى دارایی و شه‌ڕى داعشه‌وه‌ هیچ كارى له‌سه‌ر نه‌كراوه‌، ته‌نها بازاڕ و قه‌یسه‌رى كفرى نه‌بێت كه‌ ده‌ستمان به‌كاركردن كرد تێیدا.

 

وتیشى: بازاڕ و قه‌یسه‌رى كفرى له‌ رێگه‌ى ئیداره‌ى گه‌رمیانه‌وه‌ به‌شێوه‌ى ته‌نده‌رین ده‌رچو بۆ نوسینگه‌ى سبه‌ى و كومپانیایه‌كى ئێرانى به‌ گوژمه‌ى ٢٦٢ ملیۆن دینار، كه‌ دیزاینى پرۆژه‌كه‌ بكه‌ن، ئه‌وانه‌ كاره‌كانى خۆیان ته‌واو كرد، به‌ڵام تاوه‌كو ئێستا هیچ بڕه‌ پاره‌یه‌ك خه‌رج نه‌كراوه‌ بۆیان.

 

هێماى بۆ ئه‌وه‌شكرد: ئه‌م پرۆژانه‌ى ئێمه‌ له‌سه‌ر بودجه‌ى وه‌زاره‌ته‌، به‌ڵام به‌هۆى ئه‌وه‌ى شوێنه‌وار له‌ ئه‌وله‌ویه‌تى كارى حكومه‌تدا نیه‌ بۆى گرنگ نیه‌ ده‌ست پێبكاته‌وه‌ یان نا.