دەنگ نێت

 

بەرپرسێکی تەندروستی لەگەرمیان ئاشکرای دەکات ماوەی ٢ مانگە لە نەخوشخانەکانی گەرمیان ئەو دەرزییە نەماوە کە لەکاتی برینداربون و بەرکەوتنی کەرەستەی تیژ و بڕەڕ بەکاردێت و بە "گەزاز" ناسراوە، هۆکارەکەیشی نەناردنێتی لە بەغداوە.

 

رزگار لەتیف، بەڕێوەبەری نەخۆشخانەی فێرکاری فریاکەوتنی شەھید ھەژار لەکەلار، بە رادیۆی دەنگی وت: دەرزی گەزاز بەشی گەرمیان لە سلێمانیەوە وەردەگرین کە بەغدا دەینێرێت، بەڵام دو مانگە لەلایەن بەغداوە نەنێردراوە و ئێمەش نازانین ھۆکارەکەی چییە.

 

باسی لەوەشکرد: حاڵەتمان بۆ دێت کە پێویستی بەو دەرزیە دەبێت، بەڵام نەماوە و دەبێت بڕۆن لەنەخۆشخانە تاییبەتەکان بیکڕن.

 

ئاماژەی بەوەشکرد، مانگانە پێویستیان بە نزیکەی ٢٠٠ دەرزی گەزاز دەبێت و لە نەخۆشخانە تایبەتەکان نزخەکەی نزیکەی ٣٠ ھەزار دینارە.

 

گزاز یان تیتانۆس، نەخۆشیەکە کە زۆرجار بەهۆی دروستبونی برینەوە توشی مرۆڤ دەبێت کاتێک لە رێگەی ئەو برینەوە میکرۆبێک دەچێتە جەستەی کەسەکەوە و  دەستدەکات بە گەشەکردنی ناوخۆیی لە خودی برینەکەدا، بەمەش ژەهرێکی بەهێز بەرهەمدەهێنێت کە لەلایەن جەستەوە هەڵدەمژرێت و دەبێتە هۆی گرژبونی ماسولکەکان و ئەگەر چارەسەری پێویست نەکرێت کەسەکە گیان لەدەستدەدات.