دەنگ نێت

 

بەڕێوبەری خۆپاراستنى ته‌ندروستى گه‌رمیان رایده‌گه‌یەنێت: تاوه‌كو ئێستا له‌ سنورى گه‌رمیان هیچ حاڵه‌تێكى یەکلاکراوەی نه‌خۆشى كۆلێرا تۆمار نه‌كراوه‌، ئه‌وه‌ى هه‌یه‌ ٢ حاڵه‌تى گوماناویمان هه‌یه‌.

 

كامه‌ران محه‌مه‌د، بۆ رادیۆى ده‌نگ باسى له‌وه‌كرد: تاوه‌كو ئێستا هیچ حاڵه‌تێكى نه‌خۆشى كۆلێرا کە یەکلابوبێتەوە و سەلمێنرابێت، له‌ سنورى گه‌رمیان تۆمار نه‌كراوه‌.

 

ده‌شڵێت: ٢ حاڵه‌تى گوماناویمان هه‌یه‌ و نمونەمان ناردوه‌ بۆ سلێمانى بەمەبەستی پشکنین و له‌وێشه‌وه‌ ده‌چێته‌ به‌غداد، بۆیه‌ چاوه‌ڕوانى ئه‌نجامین.

 

هەفتەی رابردو ٨ حاڵەتی توشبون بە کۆلێرا لە سلێمانی ئاشکرا کرا، دواتر چاکبونەوەی هەمویان راگەیەنرا.

 

بەگشتی کۆلێرا ساڵانە لە سنوری سلێمانی بڵاودەبێتەوە، بەڵام حاڵەتەکە کەمتر لە گەرمیاندا تۆمار دەکرێت.

 

کۆلێرا، نەخۆشییەکی گوازراوەیە، بەھۆی بەکتریایەکەوە کەناوی ڤایبریۆ کۆلێرا (Vibrio cholera)یە توشی مرۆڤ دەبێت، زۆربەی کات لە رێگەی پیسبونی ئاوی خواردنەوە و خۆراکی پیسەوە بڵاودەبێتەوە، کەسی توشبو توشی سکچونی توند و رشانەوە و کرژبونی ماسولکە دەکات، ئەگەر چارەسەری پێویست وەرنەگرێت مەترست لەسەر ژیانی دروستدەکات.