دەنگ نێت

 

کوڕی بەرپرسێکی یەکێتی بە ئۆتۆمبیلێکەوە کە هی ئیدارەی گشتی یەکێتییە، بە تۆمەتی راوکردن لە سنوری گەرمیان دەستگیرکراوە، ٢ کەسیش کە لەگەڵیدابون هەڵهاتون.

 

بەڕێوبەرایەتی پۆلیسی دارستانی گەرمیان لە راگەیەنراوێکدا بڵاویکردوەتەوە: بەرەبەیانی دوێنێ مەفرەزەیەکی بنکەی پۆلیسی دارستان و ژینگەی ناحیەی مەیدان، بۆسەیان بۆ چەند کەسێک داناوە کە بۆ راوکردنی ئاژەڵی کێویی هاتبونە سنورەکە، لەئەنجامدا کەسەکان روبەڕوی مەفرەزەکە بونەتەوە و دواتر هەڵهاتون.

 

رونیشیکردەوە: تایەیەکی ئۆتۆمبێلی راوچیەکان تەقیوە و بەوهۆیەوە توانراوە دەستی بەسەردا بگیرێت و تۆمەتبارێکیشیان دەستگیر بکرێت.

 

هاشم عەلی، وتەبێژی بەڕێوبەرایەتی پۆلیسی دارستانی گەرمیان، جەختی لە روداوەکە کردەوە و بۆ رادیۆی دەنگ وتی: ۳ کەس بون، دانەیەکیان دەستگیر کراوە و دوانیان هەڵهاتون، لەئێستادا فەرمانی دەستگیرکرن بۆ دوانەکەی تریش دەرچوە.

 

بەپێی زانیارییەکانی رادیۆی دەنگ، ئەو تۆمەتبارەی دەستگیر کراوە، کوڕی بەرپرسی پێشوی مەڵبەندی گەرمیانی یەکێتییە، ئەو ئۆتۆمبێلەشی کە پێیان بوە و دەستی بەسەردا گیراوە، لە جۆری مێکزەمینییە و هی ئیدارەی گشتی یەکێتی نیشتیمانی کوردستانە.