دەنگ نێت

 

بەتۆمەتی کوشتنی راوچییەک، ٥ پۆلیسی دارستان لە سنوری گەرمیان بە فەرمانی دادوەر دەستگیرکراون.

 

شەش مانگ لەمەوبەر تەرمی راوچییەک بە کوژراوی لە ناوچەی داودەی سەر بە ناحیەی زینانە کە دەکەوێتە سنوری نێوان قەزاکانی دوزخورماتو- کفری، دۆزرایەوە، ئەوکات چەند گومانێک لەبارەی روداوەکەوە دروستبون، لەوانە: کوشتنی لەلایەن چەکدارانی داعشەوە، یان بەرکەوتنی فیشەک لەکاتی راوکردندا، گومانێکی تریش تەقەلێکردن و کوشتنی بوە لەلایەن مەفرەزەیەکی پۆلیسی دارستانەوە.

 

وەهاب ئەحمەد، بەڕێوبەری ناحیەی زینانە، بەرادیۆی دەنگی راگەیاند: ٥ پۆلیسی دارستان کە لە ناحیەکەماندان، بەتۆمەتی کوشتنی راوچییەکە، بە فەرمانی دادوەر دەستگیرکراون.

 

وتیشی: پۆلیسەکان تۆمەتبار کراون بە کوشتنی راوچییەکە، چاوەڕێی بڕیاری دادگاین بۆ ئەوەی بزانین بڕیاری لەوبارەوە چی دەبێت.