دەنگ نێت

 

۱۰ ساڵە داواکارییەکانی بەڕێوبەرایەتی رێگاوبانی گەرمیان بۆ دو سایدکردنی رێگای کەلار- پەروێزخان لە ئەنجومەنی وەزیرانە، بەهۆی قەیرانی داراییەوە پەسەند نەکراوە.

 

عەدنان خه‌لیل، بەڕێوبەری رێگاوبانی گەرمیان، بە رادیۆى دەنگی راگه‌یاند: رێگای کەلارـ پەروێزخان یەکێکە لە پرۆژە پێشنیازکراوەکانمان بۆ ئەوەی بکرێت بە دو ساید، بەڵام لە ٢٠١٤ـەوە تاوەکو ئێستا پەسەند نەکراوە.

 

وتیشی: جوتسایدکردنی رێگاکە پێویستی بە نزیکەی ٦۰ ملیار دینارە.

 

بەشێکی هەرە زۆری رێگاوبانەکانی دەرەوی قەزای کەلار پێویستیان به‌ چاکردنەوە یاخود سەر لەنوێ دروستکردنەوەیان هەیە، لەنێویاندا رێگای کەلار-پەروێزخان.

 

رێگای کەلارـ پەروێزخان، بەیەکێک لە رێگا ستراتیژیەکانی هەرێمی کوردستان دادەنرێت، سنوری وڵاتی ئێران و عێراق و هەرێمی کوردستان بەیەکەوە دەبەستێتەوە، ئەمە جگە لەوەی چەندین شارۆچکە و گوند لەسەر رێگاکە هەن.