دەنگ نێت

 

له‌ ماوه‌ى 6 مانگى سه‌ره‌تاى ئه‌مساڵدا 101 حاڵه‌تى خراپ به‌كارهێنانى ئامێره‌كانى په‌یوه‌ندیكردن تۆماركراوه‌ و وته‌بێژى به‌ڕێوبه‌رایه‌تى پۆلیسى گه‌رمیانیش ده‌ڵێت: به‌راورد به‌ پار ساڵ 34 حاڵه‌ت زیادیكردوه‌. 

 

عه‌لى جه‌مال قه‌دورى، وته‌بێژى به‌ڕێوبه‌رایه‌تى پۆلیسى گه‌رمیان،‌ بۆ رادیۆى ده‌نگ وتى: له‌ 6 مانگى سه‌رەتاى ئه‌مساڵدا 101 حاڵەتی خراپ به‌كارهێنانى ئامێره‌كانى په‌یوه‌ندیكردن تۆماركراوه‌، به‌ به‌راورد به‌ پار ساڵ 34 حاڵه‌ت زیادى كردوه‌. 

 

هێماى بۆ ئه‌وه‌شكرد: له‌ كاتى لێكۆڵینه‌وه‌دا بۆمان ده‌رده‌كه‌وێت زۆربه‌ى ئه‌و تاوانانه‌ى كه‌ كراوه‌ به‌ سیمكارتى بێناسنامه‌ی تۆڕەکانی مۆبایل كراوه‌. 

 

جه‌ختى له‌وه‌شكرده‌وه‌: له‌ گه‌رمیان به‌ره‌نگارى بوینه‌ته‌وه‌ و سیمكارتى بێناسنامه‌ نافرۆشرێت، به‌ڵام له‌ شار و شارۆچكه‌كانى ترى عێراق ده‌هێنرێت و له‌ گه‌رمیان بڵاوه‌ى پێده‌كرێت. 

 

ئه‌مه‌ له‌ كاتێكدایه‌، وه‌زاره‌تى ناوخۆی هه‌رێم  له‌ ماوه‌ی رابردودا رێنماییه‌كى ده‌ركرد و رایگەیاند هه‌ر هاوڵاتیه‌ك كڕین و فرۆشتن به‌ سیمكارتى بێناسنامه‌وه‌ بكات،‌ ده‌ستگیرده‌كرێت و روبه‌ڕوى یاسا ده‌كرێته‌وه‌.