دوای ئەوەی ئێوارەی ئەمڕۆ ۳ کەس بە فیشەک بریندار کران، پۆلیسی گەرمیان دەڵێت: تۆمەتبارەکان هەڵهاتون و دەستبەسەر ئۆتۆمبێلەکەیاندا گیراوە.

سۆران محەمەد غەریب، وتەبێژی بەڕێوبەرایەتی پۆلیسی گەرمیان بۆ رادیۆی دەنگ وتی: هێزەکانمان راستەوخۆ دوای روداوەکە لێکۆڵینەوەیان دەستپێکرد و شوێن ئۆتۆمبێلی ئەو کەسانە کەوتون کە هێرشەکەیان کردبو.

وتیشی: تۆمەتبارەکان ئۆتۆمبێلەکەیان لە کەلار بەجێهێشتوە و بە ئۆتۆمبێلێکی دیکە رۆشتون بەرەو دەربەندیخان، لەئێستاشدا دەستبەسەر ئۆتۆمبێلە بەجێهێڵراوەکەیاندا گیراوە.

دەشڵێت: بەفەرمانی دادوەر، بەپێی بڕگەی سێیەمی ماددەی ٤۱۳ لەیاسای سزادانی عێراقی فەرمانی گرتن بۆ تۆمەتبارەکان دەرچوە.

بەپێی وتەی وتەبێژی پۆلیسی گەرمیان: هۆکاری روداوەکە دەگەڕێتەوە بۆ کێشە لەسەر دانەوێڵە 'گەنم'.

ئێوارەی ئەمڕۆ لەسەر رێگای کەلارـ رزگاریی ۳ کەس بەفیشەک بریندار کران، هەر ئەو کات بەڕێوبەری نەخۆشخانەی فریاکەوتنی شەهید هەژار لەکەلار وتی: برینەکانیان سوکە و چارەسەری پێویستیان بۆ کراوە.