بەڕێوبەری بەڕێوبەرایەتی نەخشەدانانی ئاوەدانیی گەرمیان دەڵێت: زەوی فەرمانبەرانی کەلار کە خۆی لە دو زۆن دەبینێتەوە، نەخشە و دیزاین بۆ هەردو زۆنەکە تەواو بوە، بەڵام وەزارەتی کشتوکاڵ تاوەکو ئێستا رەزامەندی نەداوە لە تەرخانکردنی زۆنی دوەم.

سامان مەحمود، بۆ رادیۆی دەنگ وتی: لە کەلار زەوی فەرمانبەران خۆی لە دو زۆندا دەبینێتەوە، زۆنی یەکەم کێشەی نیە و ٥ هەزار پارچە زەوی دابەشکراوە و زەوی دیکەشمان ماوەتەوە بۆ دابەشکردن.

دەشڵێت: بەڵام لە زۆنی دوەمدا تاوەکو ئێستا وەزارەتی کشتوکاڵ رەزامەندی نەداوە بۆ تەرخانکردنی ئەو زەوییە، پێویستە شارەوانی کەلار داوا بکات و بڵێت زەوی پێویستم نییە بۆ دابەشکردن، ئەوکات رەزامەندی دەدات.

جەختی لەوەشکردەوە: بەڵام ئێمە نەوەستاوین، پێش ئەوەی رەزامەندی بدرێت، نەخشە و دیزاین و ژمارەی زەوییەکانمان تەواو کردوە.