رادیۆی دەنگ

ژمارەیەک ئۆتۆمبێل دوای وەرگرتنی بەنزینی ۷٥۰ دیناریی دەیفرۆشنەوە و دوبارە نۆرە دەگرنەوە، لایەنە پەیوەندیدارەکانیش دەڵێن: هەر ئۆتۆمبێلێک کارێکی لەو شێوەیە بکات، سزادەدرێت.

ژمارەیەک هاوڵاتی بۆ رادیۆی دەنگ باسیان لەوە کرد کە بەشێک لە شۆفێران دوای وەرگرتنی بەنزینی ۷٥۰ دیناریی، بەنزینەکە خاڵی دەکەن و دەیفرۆشنەوە و دوبارە دێنەوە بۆ نۆرەگرتن، داواش لە حکومەت دەکەن بەر بەم کارە بگرێت.

لەبەرامبەردا بەڕێوبەرایەتی نەوت و کانزاکانی گەرمیان لە رونکردنەوەیەکدا کە بۆ رادیۆی دەنگیان ناردوە دەڵێت: هەر ئۆتۆمبێلێک کارێکی لەو شێوەیە بکات سزا دەدرێت.

بەپێی رونکردنەوەکە: " ئۆتۆمبێلە تابلۆدارەکان ناتوانن کارێکی لەو شێوەیە بکەن، هاوکات ئۆتۆمبێلە بێ سەرەتاکانیش ناتوانن ئەو کارەبکەن، تەنها ئەو ئۆتۆمبێلە بێ سەرەتایانە ئەم کارە دەکەن کە ژمارەی شاسییان نییە".

ئەوەش هاتوە: ئێمە ئۆتۆمبێلە بێ سەرەتاکان بە ژمارەی شاسی بەنزینیان پێدەدەین و هەفتەی جارێک ٥۰ لیتر بەنزینیان بەردەکەوێت، بەڵام هەندێکیان ژمارەی شاسیان نییە و ئەو ئۆتۆمبێلانە کۆنترۆڵ ناکرێت.

بەپێی رونکردنەوەکە: "ئێمە هەماهەنگیمان کردوە لەگەڵ بەڕێوبەرایەتی هاتوچۆی گەرمیان، هەر ئۆتۆمبێلێک وابکات و پێی بزانرێت، بێگومان سزا دەدرێت و دەستبەسەر ئۆتۆمبێلەکەیدا دەگیرێت".