رادیۆی دەنگ

ناوەڕۆکی ئەو ١٢ خاڵە ئاشکراکرا کە وەکو یاداشتێک پێشکەش بە سەرۆک کۆماری عێراق کرا، هەندێک لە خاڵەکان پەیوەستن بە بواری ئەمنی و هەندێکی تریان سیاسی و ئابوریین.

سەرلەبەیانی ئەمڕۆ ژمارەیەک کەسایەتی و چالاکی سیاسی و مەدەنی، بەنوێنەرایەتی قەزای خانەقین سەردانی سەرۆک کۆماری عێراقیان کرد و یاداشتێکی ١٢ خاڵییان پێشکەشکرد.

بەپێی ئەو یاداشتەی دەست رادیۆی دەنگ کەوتوە، داواکارییەکان بریتین لە:

* بەڕێوەبردنی دۆسیەی ئەمنیی قەزاکە تەنها لەلایەن دەزگا ئەمنییە فەرمییەکانەوە بێت و رێگریکردن لە دەستوەردانی هەر لایەنێکی دیکە.

* پێکهێنانی ئیدارەیەکی مەدەنیی هاوبەش بۆ دۆسیەی سەربازیی لە خانەقین و ئەو ناوچانەی پارێزگای دیالە کە ماددەی ١٤٠ دەیانگرێتەوە.

* راگرتنی بڕیاری گۆڕینی ناحیەکانی (قەرەتەپە و جەلەولا) بۆ قەزا، چونکە ئەم بڕیارە لەگەڵ ناوەڕۆک و رۆحی ماددەی ١٤٠ـدا ناگونجێت.

* کاراکردنەوەی نوسینگەی مادەی ١٤٠ و گۆڕینی بەڕێوەبەری نوسینگەکە.

* لابردنی بازگەی گومرکی "باوە مەحمود" کە بوەتە هۆی دروستکردنی گوشار و گەمارۆ لەسەر دانیشتوانی شارەکە.

* راگرتنی گواستنەوەی (ناسنامەی نیشتمانی، فۆرمی خۆراک و کارتی نیشتەجێبون) بۆ ناوچەکە، لەگەڵ سڕکردنی بڕیارەکانی خاوەندارێتی (تملیک) بۆ زەوییە کشتوکاڵییەکان.

* چەسپاندنی هاوسەنگی لە پۆستە کارگێڕییەکانی پارێزگای دیالە و تەرخانکردنی رێژەیەکی شایستە بۆ کەسە لێهاتو و کارامەکانی شاری خانەقین.

* تەرخانکردنی بودجەیەکی تایبەت بۆ ئاوەدانکردنەوەی خانەقین، وەک شارێک کە لە رابردودا پشتگوێخراوە.

* دانپێدانانی وەزارەتی خوێندنی باڵا و توێژینەوەی زانستی بە "زانکۆی گەرمیان" کە سێ کۆلێژ لە خانەقین لەخۆدەگرێت و وەک دیارییەکی خوالێخۆشبو "سەرۆک مام جەلال" دامەزراون، بە مەبەستی زامنکردنی مافی سەدان دەرچوی زانکۆکە.

* راگرتنی تێکدان و راماڵینی باخەکان و رێگریکردن لە دەستدرێژیکردنەسەر موڵک و ماڵی دەوڵەت.

* زامنکردنی ئازادیی کاری سیاسی و رێکخراوەیی بۆ حزبە کوردستانییەکان و دوبارەکردنەوەی بارەگاکانیان لە جەلەولا، سەعدییە و ناوچەکانی دیکە.