رادیۆی دەنگ
کاروان یاروەیس، لێپرسراوی مەڵبەندی خانەقینی یەکێتی نیشتمانی رایگەیاند: ئەمڕۆ هەریەکە لە ئەبو مونتەزر و رێبینی ئاسنگەر، ئازاد کراون.
ئەبو مونتەزر، پێشتر بەرپرسی رێکخراوی بەدر و دواتر عەسایبی ئەهلی حەق بو لە خانەقین، لەم ماوەیەی رابردودا چوە ریزی یەکێتییەوە. لەسەروبەندی ئەو خۆپیشاندانەی کە بڕیاربو دوێنێ لە خانەقین ئەنجام بدرێت، دەستگیرکرا.
رێبین ستار، چالاکێکی کوردی خانەقینە و کاری ئاسنگەریی دەکات. لەم رۆژانەدا تابلۆی شوێنکارەکەی کرد بە کوردیی و لە تۆڕە کۆمەڵایەتییەکانیشیەوە داکۆکی لە کوردیی نوسین و قسەکردن دەکرد. ئەویش شەوی پێش ئەو خۆپیشاندانەی بڕیاربو دوێنێ لە شارەکەدا ئەنجام بدرێت، دەستگیرکرا.
هاوکات لێپرسراوی مەڵبەندی خانەقینی یەکێتی ئاشکرایکرد کە شاندێک لە کەسایەتی و چالاکوانی خانەقین، بەڕێکەوتون بۆ بەغدا و بڕیارە لەگەڵ سەرۆک کۆمار و وەزیری داد و هادی عامری کۆببنەوە و یاداشتێکی ١٢ خاڵیی بخەنەڕو کە داواکاریی شارەکە لەخۆدەگرێت.
