رادیۆی دەنگ

شۆفێرانی سنوری گەرمیان گازندەیان لە کوالێتی بەنزینی ٧٥٠ دیناری هەیە و دەڵێن سەرەتا باش بو و ئێستا خراپ بوە، لەبەرامبەردا بەڕێوبەری نەوت و کانزاکانی گەرمیان دەڵێت: هەمان کوالێتی بەنزینی نۆرماڵە و خۆم بۆ ئۆتۆمبیلەکەم بەکاری دێنم.

رێباز محێدین، شۆفێر لە کەلار، بە رادیۆی دەنگی وت: کوالێتی ئەو بانزینەی بە ٧٥٠ دینار دابەش دەکرێت خراپە، داوا دەکەم حکومەت پشکنینی بۆ بکەن و کێشەکە چارەسەر بکەن.

لایخۆشییەوە، ئومێد حەسەن، شۆفێری مینی پاس لە کەلار، جەختی لە قسەی شۆفێرەکەی تر کردەوە و وتی: لەسەرەتادا کوالێتی بەنزینەکە زۆرباش بو، بەڵام ئێستا گەیشتوەتە ئاستێک کە ئۆتۆمبێلەکان وەکپێویست ناڕۆن و زیانی زۆری بە بزوێنەری ئۆتۆمبێلەکانمان گەیاندوە. 

لەبەرامبەردا، بەڕێوبەری بەڕێوبەرایەتی نەوت و كانزاكانی گەرمیان، باس لەوە دەکات "کوالێتییەکەی نەگۆڕدراوە و هەر وەک پێشوترە".

یادگار فەتاح، بۆ رادیۆی دەنگ وتی: ئەو بەنزینەی کەدێت وەکو پێشوتر پشکنینی بۆ دەکرێت و لەپشکنینەکاندا بەنزینێکی نۆرماڵی شیاوە و هیچ گرفتێکی نییە.

وتیشی: تاوەکو ئێستا هیچ کەسێک نەهاتوە بۆ لامان بۆ سکاڵاکردن لەسەر بەنزینەکە.

جەختیشیکردەوە: "ئەم بەنزینە هەمان کوالێتی بەنزینی نۆرماڵە و هیچ گرفتێکی نییە".

بەوتەی ئومێد حەسەنی شۆفێری مینی پاس، جگە لە کوالێتییکەی، بۆنی بەنزینەکەش ناخۆشە. لەوبارەوە وتی: بەهۆی بۆنی توند و ناخۆشی بەنزینەکەوە، مانەوە لە ناو پاسەکاندا بێزارکەر بوە.

لەمبارەیەوە، بەڕێوبەری نەوت و کانزاکانی گەرمیان، دەڵێت: بەنزین مەوادی کیمیایی تێدایە، هەمو ماددەیەکی کیمیایی بۆنی هەیە، بەڵام خۆم لەو بەنزینە دەکەمە ئۆتۆمبێلەکەم و بەو شێوەیە نییە کە باس دەکرێت بۆنێکی زۆری بێزارکەری هەبێت، جگە لەوەش شۆفێرێک سکاڵای نەکردوە لەلامان نە بۆ خراپی کوالێتی نە بۆ بۆنی ناخۆشی بەنزینەکە.