رادیۆی دەنگ

بەپێی ژمارەیەک نوسراو کە وێنەیەیان دەست رادیۆی دەنگ کەوتوە، چوار بەرپرسی حکومی لە گەرمیان، ٤ خانوی موڵکی حکومەت کە بەکاتیی دراوە پێیان، نەیانگەڕاندوەتەوە و فرۆشتویانە.

 لەساڵی ۲۰۰۲ رێکخراوی 'هابیتات' لەسەر زەوی شارەوانی سەرقەڵا، ٥۰ خانوی دروستکرد، ٤ لەو خانوانە بۆ 'منصب' یان بۆ بەرپرسانی ناوچەکە دیاریکران کە خەڵکی ناوچەکە نین، بۆ ئەوەی زۆر هاتوچۆ نەکەن و لە ناحییەکەدا بمێننەوە.

بەپێی نوسراوێک کە واژوی سەرۆکی شارەوانی سەرقەڵای لەسەرە و لە رێکەوتی ۲۷ـی ٤ـی ۲۰۲٦ دەرچوە و ئاراستەی بەڕێوبەرایەتی ناحییەکە کراوە، هاتوە کە ئەو چوار خانوە موڵکی شارەوانی سەرقەڵان و نەگەڕێندراونەتەوە، بەڵکو لەلایەن ئەو بەرپرسانەی کە بە کاتیی پێیاندراوە، فرۆشراون.

نوسراوەکەی شارەوانی سەرقەڵا، لەلایەن بەڕێوبەرایەتی ناحییەکەوە ئاڕاستەی قایمقامیەتی قەزای کفری کردوە، قایمقامیەتی کفریش ئاڕاستەی ئیدارەی گەرمیانی کردوە و داوایکردوە کاری پێویست لەگەڵ دۆسییەکەدا بکەن.

ئەو خانوانە ژمارەکانیان بریتییە لە (٤٥/٤٨/٤۹/٥۰)ـو لەلایەن بەرپرسە خانەنشینکراوەکانەوە فرۆشراون.