رادیۆی دەنگ

پرۆسەی دەرکردنی مۆڵەتی تەندروستی بۆ شوێنکارەکان و پێدانی کارتی تەندروستی بە کرێکاران، دراوە بە کۆمپانیا و نرخەکان بەڕادەیەکی بەرچاو گران کراون، وتەبێژی تەندروستی گەرمیانیش جەخت لەوە دەکاتەوە کە بڕیارەکە لە هەمو کوردستان جێبەجێ دەکرێت و تایبەت نییە بە گەرمیان.

بەپێی زانیارییەکانی رادیۆی دەنگ، لەماوەی رابردودا دەرکردن و نوێکردنەوەی مۆڵەت و ناسنامەی تەندروستی بۆ شوێنکار و کرێکاران، دراوە بە کۆمپانیا و نرخەکەیشی زیاد کراوە.

هەربەپێی زانیارییەکان، رسوماتی دەرکردن و نوێکردنەوەی مۆڵەتی تەندروستی شوێنکارەکان، ٤٠٪ زیادیکردوە.

هاوکات دەرکردن و تازەکردنەوەی ناسنامەی تەندروستی بۆ کرێکاران، ئەویش بەهەمانشێوە زیادکراوە، بەجۆرێک پێشتر بۆ دەلاک و قەساب و ساڵۆن و گۆشتفرۆش، ١٧ هەزار دینار وەردەگیرا کە ١٥ هەزاری بۆ پشکنینی خوێن و ٢ هەزاری بۆ چاپکردنی کارتەکە بوە، بەڵام ئێستا نرخەکە بوەتە ٢٣ هەزار کە پارەی پشکنین هەروەکخۆی ١٥ هەزارە و پارەی چاپی کارتەکە کراوەتە ٨ هەزار.

هەرچی نانەوا و چایچی و نانفرۆش و ئەو کرێکارانەیە کە لە خواردنگە و چێستخانەکاندا کاردەکەن، پێشتر دەرهێنانی ناسنامەی تەندروستی بۆیان ٥ هەزار دینار دەکەوت (٣ هەزار بۆ پشکنینی تاقیگەیی و ٢ هەزار بۆ چاپکردنی کارتەکەیان)، بەڵام ئێستا بوە بە ١١ هەزار (٣ هەزار بۆ پشکنین و ٨ هەزار بۆ چاپی کارتەکە).

هەربەپێی زانیارییەکان، پارەی چاپی کارتەکان کە زیادیکردوە، کۆمپانیا وەریدەگرێت.

لەبارەی ئەم کارەوە، ئازاد حەمەفەرەج، وتەبێژی بەڕێوبەرایەتی گشتی تەندروستی گەرمیان بۆ رادیۆی دەنگ وتی: ساڵانی پێشو بەڕێوبەرایەتی خۆپاراستنی تەندروستی گەرمیان رێگەپێدانی تەندروستی دەکرد بۆ خاوەنکار و کارمەندەکان، بەڵام ئەمساڵ کۆمپانیا کارەکە بەڕێوەدەبات.

وتیشی: کۆمپانیاکە لەئەمساڵەوە لە گەرمیان دەستبەکار بوە، ئەگینا پێشتر لە شوێنەکانی تری هەرێمی کوردستان دەستبەکاربوە، ئەمەش بڕیاری وەزارەتی تەندروستییە بۆ هەمو پارێزگا و ئیدارە سەربەخۆکان و تەنها لای ئێمە نییە.