رادیۆی دەنگ

لە ناحییەی باوەنور و دەوروبەری نزیکەی ١٤٠٠ فەرمانبەر هەن، کەچى تاوەکو ئێستا ئامێری راکێشانی پارە ATMـی بۆ دانەنراوە، چالاکوانێکیش دەڵێت: چەندجارێک داوامان کردوە، بەڵام کاری لەسەر نەکراوە.

ئاکۆ محەمەد، چالاکوان لە ناحییه‌ى باوه‌نور، بۆ رادیۆی دەنگ باسی لەوەکرد: سەرباری بونی رێژەیەکی زۆری فەرمانبەر تاوەکو ئێستا ئامێری ATM تایبەت بە راکێشانی پارە لە ناحییەکەدا نیە.

دەشڵێت: هەرچی فەرمانبەرە ناچارە بێتە قەزای کەلار موچە وەربگرێت، لە کاتێکدا ئەمە گرفتە بۆ ئێمە، چونکە بەشێک لە فەرمانبەران ئۆتۆمبێلیان نییە و دەستیان ناگاتە هێڵی گواستنەوەی گشتی.

جەختی لەوەشکردەوە: کە دێینە سەنتەری قەزاش ئامێرەکانی لۆدی زۆری لەسەرە و ناچارین چاوەڕێ بکەین بۆ ماوەی هەفتەیەک تاوەکو ئەو لۆدە نامێنێت، یان دەبێت برۆین لە نوسینگەکانی ئاڵوگۆڕی دراو موچەکانمان وەربگرین.

هێمای بۆ ئەوەشکرد: چەند جارێک لەڕێگەی بەڕێوبەری ناحییە و قایمقامی کەلار و ئیدارەی گەرمیانەوە داوای دابینکردنی ئامێرەکەیان کردوە، بەڵام تاوەکو ئێستا هیچیان بۆ نەکراوە.