رادیۆی دەنگ

لەکاتێکدا بازاڕی کڕین و فرۆشتنی خانو و زەوی لەکەلار سستی بەخۆیەوە بینیوە، بەڵام وەک خاوەنی نوسینگەکانی خانوبەرە ئاماژەی پێدەکەن، خواست لەسەر خانوی کرێ زۆرە و هەندێکجاریش دەستناکەوێت.

ئازاد حەسەن، خاوەنی نوسینگەی خانوبەرە لەکەلار، بە رادیۆی دەنگی راگەیاند: بازاڕی کڕین و فرۆشتنی خانو و زەوی سستە، ئەمەش بەهۆی کەمبونی پارە لە دەستی هاوڵاتیان و ئاڕاستەکردنی سەرمایە بەرەو پڕۆژەکانی نیشتەجێبون (سیتییەکان).

وتیشی: بەڵام هاوکات بەم واقیعە، بازاڕی کرێ چالاکە.

رونیکردەوە: خواست لەسەر خانوی کرێ لەناو شار و سیتییەکانیشدا ئەوەندە زۆرە، هەندێکجار دەستناکەوێت، تەنانەت جاری واهەیە بۆ خانویەکی کرێ "سەدان کەس پەیوەندیمان پێوەدەکەن".

لایخۆشییەوە سابیر عەزیز، بازرگانی بواری عەقارات لە کەلار، بە رادیۆی دەنگی وت: چەند ساڵێکە قەیرانی کرێ هەیە و خانوی کرێ دەستناکەوێت.

رونیشیکردەوە: ئێستا بەتایبەت کێشەی شوقەی کرێ هەیە کە کەسانێک شوقەی ئامادە "مفروش"ـیان دەوێت بۆ ئەوەی بە کرێی بگرن، بەڵام دەستناکەوێت، چونکە لە بنەڕەتەوە شوقە لەشاردا کەمە.