لەبەرامبەر ناڕەزایەتی نزیكەی ٤٠٠ جوتیار و خاوەن باخی كەرتی ١٠٢ـی كەلاری كۆن کە زەوییەكانیان دەدرێتە فەرمانبەران، بەرپرسی لقی گەرمیانی یەكێتی جوتیاران دەڵێت: لەم دو مانگەدا قەرەبویان دەكرێتەوە.

جەلال ئەحمەد، بەرپرسی لقی گەرمیانی یەكێتی جوتیاران بە رادیۆی دەنگی وت: لیژنەی ٢٢٢ لەلایەن ئەنجومەنی وەزیران پێكهێنراوە بە سەرۆكایەتی بەڕێوبەری گشتی كشتوكاڵی گەرمیان و سێ ئەندامی شارەوانی و ئەندامانی كشتوكاڵی گەرمیان/ بەشی روپێویی و زەویوزار، لەگەڵ ئەندامی لقی گەرمیانی یەكێتی جوتیاران .

دەشڵێت: روپێوی هەمو زەوییەكان كراوە و بە یاداشتێك دەدرێتە بەڕێوبەری گشتی كشتوكاڵی گەرمیان و دواتر وەك لیژنەكە بڕیاری لەسەر دەدەین و قەرەبوەكان دیاریدەكەین و دەدرێتە شارەوانی بۆ جێبەجێكردنی.

وتیشی:كارەكانی ئەم پرۆسەیەش زۆری نەماوە و لەم دو مانگەی داهاتودا هەمو قەرەبوەكان دەدرێتە ئەو خاوەن باخ و جوتیارانە.

ئەمە لە كاتێكدایە كە جوتیار و خاوەن باخانەکانی ئەو کەرتە، لە چەند رۆژی رابردودا لە بەردەم سەرۆكایەتی شارەوانی كەلار گردبونەوەیان ئەنجامدا و ناڕەزایەتییان دەربڕی بەهۆی قەرەبونەكردنەوەیان.