رادیۆی دەنگ

‌بەرەبەیانی ئەمڕۆ له‌ گه‌ڕه‌كى خەبات "شەهیدان" لە قه‌زاى كه‌لار، ٣ ئۆتۆمبێلى بارهه‌ڵگر کە بەتەنیشت یەکەوە بون، سوتان. له‌باره‌ى هۆكارى سوتانه‌كەوە به‌رگرى شارستانى گەرمیان ده‌ڵێت دۆسییەکەمان داوە بە‌ پۆلیس و پۆلیسیش جه‌خت‌ ده‌كاته‌وه‌ کە دەستیان بە لێکۆڵینەوە کردوە و دو کەسیان دەستگیرکردوە.

ئیبراهیم محه‌مه‌د، وته‌بێژى به‌ڕێوبه‌رایه‌تى به‌رگرى شارستانى گه‌رمیان، بۆ رادیۆى ده‌نگ باسى له‌وه‌كرد: کاتژمێر ٢:٣٠ـی بەیانی ئەمڕۆ، سێ ئۆتومبیلی بارهەڵگر لەگەڕەکی خەبات ئاگریان گرت، دەستبەجێ تیمەکانمان گەشتنە سەر  روداوەکە و لەماوەیەکی کەمدا ئاگرەکەیان کۆنترۆڵکرد و دو ئۆتومبیلی بارهەڵگری تریان لەسوتان پاراست.

لەبارەی هۆکاری روداوەکەوە، وتی: بابه‌ته‌كه‌مان داوەتە‌ پۆلیس به‌مه‌به‌ستى لێكۆڵینه‌وه‌كردن.

له‌به‌رامبه‌ردا، عه‌قید سۆران محه‌مه‌دغەریب، وته‌بێژى به‌ڕێوبه‌رایه‌تى پۆلیسى گه‌رمیان به‌ رادیۆى ده‌نگى وت: چاوه‌ڕوانى راپۆرتى به‌رگرى شارستانین بەوپێیەی‌ روداوى ئاگركه‌وتنه‌وه‌یه‌.

وتیشی: هاوکات هێزەکانی پۆلیس بە خێرایی لە شوێنی روداوەکە ئامادەبون و دەستیان بە لێکۆڵینەوە کرد، لە ئەنجامی لێکۆڵینەوە سەرەتاییەکاندا، دو کەس دەستگیر کراون و بە بڕیاری دادوەر بەمادەی (345) لەیاسای سزادانی عێراقی راگیراون و لێکۆڵینەوەکان بۆ دیاریکردنی هۆکار و هەلومەرجی تەواوی روداوەکە  بەردەوامە.