زیاتر لە چوار مانگ تێدەپەڕێت بەسەر هاتنی لیژنەیەکی بەدواداچونی وەزارەتی خوێندنی باڵای عێراق بۆ گەرمیان بەمەبەستی دانپێدانانی زانکۆی پۆلەتەکنیک، بەڵام تائێستا سەردانەکە دەرەنجامی نەبوە، سەرۆکی زانکۆی پۆلەتەکنیکیش دەڵێت: هۆکارەکەی دەستبەکارنەبونی وەزیری نوێی خوێندنی باڵای عێراقە.

د. چیا محەمەد، سەرۆکی زانکۆی پۆلەتەکنیکی گەرمیان، بۆ رادیۆی دەنگ وتی: هەمو رێکاره‌ ئیدارییەکانی دانپێدانانی زانکۆی پۆلەتەکنیک تەواو بوە، تەنانەت راپۆرتی تایبەت ئامادەکراوە و ئاراستەی وەزارەتی خوێندنی باڵای عێراق کراوە.

وتیشی: بەڵام تاوەکو ئێستا هیچ وەڵامێکمان بۆ نەهاتوەتەوە، ئێمەش چاوەڕوانی وەزارەتین.

هێمای بۆ ئەوەشکرد: بەپێی ئەو زانیارییانەی پێمانگەشتوە، هۆکارەکەی ئەوەیە وەزیری نوێی خوێندنی باڵای عێراق دەستبەکار نەبوە و وەزارەتەکە لەلایەن وەزیری تەندروستییەوە بەوەکالەت بەڕێوەدەبرێت، ئەمەش وایکردوە کارەکانی ئەو پرۆسەیە دوابکەوێت.