رادیۆی دەنگ

بۆ ماوەی نزیکەی دو ساڵە فرۆشتنی زیاتر لە ١٠ پارچە زەوی لە قەزای کفری لەلایەن داواکاری گشتیەوە راگیراوە، سەرۆکی شارەوانی قەزاکەش دەڵێت: رونکردنەوەمان داوە بەڵام داواکاری گشتی وەڵامی نەداوینەتەوە.

عەلی خورشید، سەرۆکی شارەوانی قەزای کفری، بۆ رادیۆی دەنگ باسی لەوە کرد: کۆمەڵێک زەویمان هەبو کە بەشێوەی زیادکردنی ئاشکرا فرۆشتنمان بۆ کرد، ئەوەبو ١٣ پارچەیەکی داواکاری گشتی گەرمیان رایگرت، داوایکرد نەفرۆشرێت.

دەشڵێت: هۆکاری راگرتنەکەی ئەوەبو کە لەسەر سکاڵای هاوڵاتیەک کە گوایە کڕیارەکان لە نێو خۆیان رێککەوتبن لە کاتی موزایەدەکەدا، بۆیە داواکاری گشتی پرۆسەکەی راگرت.

وتیشی: ئێمە وەڵامی ئەو تۆمەتەمان داوەتەوە، وتومانە لە کاتی موزایەدە هیچ شتێکی لەوشێوەیە نەبوە، بەڵام تاوەکو ئێستا داواکاری گشتی وەڵامی رونکردنەوەکەی ئێمەی نەداوەتەوە و بابەتەکە وەکخۆی ماوەتەوە.