هاوڵاتیانى قه‌زاى رزگاریی باس لەوە دەکەن ئه‌گه‌ر بیانه‌وێت بە تەکسی بێنه‌ قه‌زاى كه‌لار، خاوه‌ن مینی پاسه‌كان رێگریان لێدەکەن و ناچاریان ده‌كه‌ن به‌ پاس هاتوچۆ بكه‌ن، هۆشداری دەدەن کە ئەمە رەنگە سەربکێشێ بۆ کێشەی کۆمەڵایەتی.

ژاڵا عوبێد، دانیشتوى قه‌زاى رزگاریی،‌ بۆ رادیۆى ده‌نگ باسى له‌وه‌كرد: یه‌كێك له‌و كێشانه‌ى روبه‌ڕومان ده‌بێته‌وه‌ رۆژانه‌ ئه‌گه‌ر بمانه‌وێت بێینه‌ قه‌زاى كه‌لار، ئه‌گه‌ر له‌به‌رده‌م ده‌رگا سه‌ر ته‌كسى نه‌كه‌وین و بێینە سه‌ر جاده‌ سه‌ر بكه‌وین، ئه‌وه‌ خاوه‌ن پاسه‌كان هاوڵاتیان رێگری دەکەن و ناهێڵن و ناچارت ده‌كه‌ن دابەزیت و به‌ پاس هاتوچۆ بكه‌یت.

ده‌شڵێت: رۆژانه‌ چه‌ندین به‌ریه‌ككه‌وتن به‌وهۆیه‌وه‌ دروست ده‌بێت، له‌ كاتێكدا نابێت هاوڵاتى ناچار بكرێت بە پاس یان بە تەکسی هاتوچۆ دەکات و ئەوە بژاردەی خۆیەتی.

جه‌ختى له‌وه‌شكرده‌وه‌: ئه‌گه‌ر چاره‌سه‌رێك بۆ ئه‌م بابه‌ته‌ دانه‌نرێت، ئه‌وا ره‌نگه‌ كێشه‌ى كۆمه‌ڵایه‌تى روبدات.

له‌مباره‌یه‌وه‌ رادیۆى ده‌نگ چه‌ند جارێك په‌یوه‌ندى به‌ ئیدریس مسته‌فا، به‌ڕێوبه‌رى بەڕێوبەرایەتی گواستنه‌وه‌ى گه‌رمیانه‌وه‌ كرد، بەڵام په‌یوه‌ندیه‌كانى بێوه‌ڵام بو.