دوای ۱۱ رۆژ گەڕان بەدوای تەرمی 'ئەحمەد'ـی ۲٦ ساڵان بەردەوامە، بەڕێوبەرایەتی بەرگری شارستانی گەرمیان دواین زانیارییەکان لەوبارەیەوە دەخاتەرو.

ئیبراهیم محەمەد، وتەبێژی بەرگری شارستانی گەرمیان بۆ رادیۆی دەنگ وتی: تیمەکانمان بەردەوامە لە گەڕان بەدوای تەرمی گەنجە خنکاوەکە، بەڵام تاوەکو ئێستا نەدۆزراوەتەوە.

وتیشی: دوای کۆبونەوە لە ئیدارەی گەرمیان شێوازی گەڕانمان بۆ دوبەش دابەش کردوە، بەشێکیان لە نێو ئاوەکەیەو بەشێکی دیکە لە دەرەوە.

دەشڵێت: لە قەراغی روبارەکە هەر رۆژەو بە پیادەڕۆیی بەڕێوبەرایەتییەک دەگەڕێن، بۆنمونە ئەمڕۆ بەڕێوبەرایەتی پۆلیسی دارستان و ژینگەی گەرمیان بو، بەڵام بۆ ناو ئاوەکە تیمی تایبەتمان هەیەو رۆژانە بەردەوامن لەگەڕان.

بەپێی وتەی وتەبێژی بەرگری شارستانی گەرمیان؛ دوای گۆڕانکاری لە رێرەوی ئاوی روبارەکە لەناو کەلار و نزیک کۆرنیشی مارێنا، سبەی ئاو بەتەواوەتی کەمی کرد، ئەو کات ئەوێش بەوردی دەگەڕێین.

رۆژی (١٧ـی ٦ـی ٢٠٢٥)، 'ئەحمەد لوقمان'ـی تەمەن ٢٦ ساڵان، لەگەڵ ئامۆزایەکیدا چونە سەر روباری سیروان بۆ مەلەکردن و راوی ماسی، بەڵام ئەحمەد لەنێو روبارەکە قاچی دەخلیسکێت و ئاوی روبارەکە دەیبات لەگەڵ خۆیدا.