لە ماوەی ساڵی ٢٠٢٥ـدا حاڵەتەکانی هاوسەرگیریی و جیابونەوەی هاوسەران لە سنوری گەرمیان زیادیانکردوە، ئەمەش بەپێی راپۆرتێکی رێکخراوی هاریکاری یاسایی ژنان (WOLA).

لە راپۆرتەکەدا ئاماژە بەوەدراوە کۆی گشتی ٦١,٣٢٨ پرۆسەی مارەبڕین لە دادگاکانی هەرێمدا لەماوەی ساڵی ٢٠٢٥ ئەنجامدراوە، کە ٣,٠٦٦ هاوسەرگیرییان لە سنوری گەرمیان بوە، بەمەش ٣٦٠ پرۆسە لەچاو ساڵی پێشو زیادیکردوە.

لەبارەی تەڵاق و لێکجیابونەوەشەوە، ئەوا لە سەرجەم پارێزگا و ئیدارەکان ١٥,٨٢٦ کەیس بوە، کە ٩٩٠ کەیسیان لە سنوری گەرمیان بوە، ئەمەش ٢٦٢ کەیس زیاترە لەساڵی پێشتر.

راپۆرتەکە تایبەتە بە چاودێریی جێبەجێکردنی یاسای بەرەنگاربونەوەی توندوتیژیی خێزانی لە هەرێمی کوردستان، ساڵانە رێکخراوەکە بە پاڵپشتی سندوقی نیشتمانی بۆ دیموکراسی (NED) ئامادەی دەکات.