رادیۆی دەنگ- شیرین ئەحمەد

لە سەردەمێکدا کە فەرمانگە چیتر تەنها رێگای گەیشتن بە ئامانجەکان نین، کچێکی بەهرەمەند لە گەرمیانەوە دەیسەلمێنێت کە جیهانی دیجیتاڵی دەکرێت ببێتە گەورەترین مەیدانی سەرکەوتن.
هودا عەبدولواحید، ئەو کچە داهێنەرەیە کە توانیویەتی بە ئیرادەیەکی پۆڵایین و بەکارهێنانی دروستی تەکنەلۆجیا، خەونەکانی لە ناو پانتاییەکی بچوکی ماڵەکەیەوە بگوازێتەوە بۆ ناو دڵی بازاڕ و سۆشیاڵ میدیا.
ئەو بە دامەزراندنی براندی "هود گەلەریی"، توانی کۆمەڵێک بەرهەمی ناوازە بخاتە بەردەست کڕیارانی، کە پێکهاتون لە: پلانەری تایبەت بە رێکخستنی ژیان، رێبەری خەیاتی و قورئانی پیرۆز بە خەتی کاڵ.


تێکەڵەیەک لە کولتور و پێداویستی سەردەم

کارەکانی هودا تەنها دیزاینێکی سادە نین؛ ئەوان بەرهەمی بیرکردنەوەیەکی قوڵن بۆ چارەسەرکردنی کێشە رۆژانەکانی خەڵک.
بەرهەمەکانی ئەو تێکەڵەیەکی جوانن لە بەها ئاینییەکان و کولتوری رەسەنی کوردیی، کە ئەمەش وایکردوە ببێتە جێگەی سەرنجی کڕیاران لە هەمو تەمەن و چینە جیاوازەکان.
ئەو باس لەوەدەکات هەوڵی داوە بەرهەمێک بخولقێنێت کە هەم سودبەخش بێت و هەمیش رەنگدانەوەی ناسنامەی خۆی بێت.
دەنگ

سۆشیاڵ میدیا؛ هاوپەیمانی ژنانی خاوەنکار

لەبری گەڕان بەدوای دوکانێک و تێچویەکی زۆر، هودا تۆڕە کۆمەڵایەتییەکانی کردە سەکۆیەک بۆ ناساندنی بەهرەکانی.
ئەو توانیویەتی بێ بەربەستی جوگرافی، بگاتە کڕیاران لە دورترین ناوچەکانی کوردستان.
سەرکەوتنی هودا لە کارەکەیدا، سەلمێنەری ئەو راستییەیە کە تەکنەلۆجیا گەورەترین هاوپەیمانی ژنانە بۆ گەیشتن بە سەربەخۆیی دارایی و شکاندنی ئەو کۆت و بەندانەی کە رەنگە لە بازاڕە تەقلیدییەکاندا روبەڕویان ببێتەوە.

پەیامێک بۆ داهاتو: "مەترسن"

هەمیشە دەستپێکردنی کارێکی نوێ ترس و دو دڵی لەگەڵ خۆیدا دەهێنێت، بەتایبەت بۆ ژنان کە رەنگە رێگاکەیان پڕبێت لە بەربەست. بەڵام هودا پەیامێکی رون و پڕ لە وزەی بۆ کچانی وڵاتەکەی هەیە.
دەڵێت: "مەترسن؛ ترس کاتێک دەڕوات کە یەکەم هەنگاو دەنێیت".

چیرۆکی ئیرادە

چیرۆکی "هود گەلەری" تەنها چیرۆکی فرۆشتنی چەند بەرهەمێک نییە، بەڵکو گێڕانەوەی سەرکەوتنێکە کە تێیدا ئیرادەی کچێک و ئامرازەکانی سەردەم یەکیان گرتوە.
زمانی حاڵی ئەو کچە دەڵێت: کاتێک باوەڕت بە خۆت هەبێت، ماڵێکی بچوکیش دەتوانێت ببێتە سەرچاوەی گۆڕانکاریی.