رادیۆی ده‌نگ- شیرین ئه‌حمه‌د

 

لە ماوەی هەشت مانگی ڕابردودا، گەرمیان 165 حاڵەتی توندوتیژی ئەلیکترۆنی بەرامبەر بە ژنان تۆمارکردوە، ئەمەش ئاماژەیەکی مەترسیدارە بۆ زیادبونی ئەم دیاردەیە لە سنورەکەدا، پۆلیسی گەرمیان و چالاکوانانی بواری ژنان نیگەرانی خۆیان دەردەبڕن و داوای بڵاوکردنەوەی هۆشیاری زیاتر دەکەن بۆ روبەڕوبونەوەی ئەم کێشەیە.

 

ئامارەکان قسە دەکەن

 

بەپێی ئامارەکانی بەڕێوەبەرایەتی پۆلیسی گەرمیان، لەماوه‌ى 8 مانگی یەکەمی ئەمساڵدا، 165 حاڵەتی توندوتیژی جۆراوجۆر بەهۆی ئامێرەکانی پەیوەندیکردنەوە تۆمارکراون، کە زۆربەیان هەڕەشەکردن و توندوتیژی بوە بەرامبەر بە ژنان.

 

چالاکوانان: 70%ـی کێشەکانی ژنان پەیوەندی بە سۆشیاڵ میدیاوە هەیە

 

چالاکوانێكى ژنان له‌ گه‌رمیان ئاماژه‌ به‌وه‌ده‌كات، لە ئێستادا 70%ـی کێشەکانی ژنان توندوتیژییە بەرامبەریان لە ڕێگەی سۆشیاڵ میدیاوە.

 

مژدە محەمەد، له‌ لێدوانێكدا بۆ رادیۆی ده‌نگ، هۆکارەکانی زیادبونی ئەم دیاردەیەی گەڕاندەوە بۆ چەند خاڵێک، لەوانە: خراپ بەکارهێنانی ئامێرەکانی پەیوەندیکردن، نەبونی هۆشیاری گشتی لەبارەی سزای خراپ بەکارهێنانی ئامێرە ئەلیکترۆنییەکان، هەروەها ترسی ژنان لە تۆمارکردنی سکاڵا بەهۆی هەڕەشەکان و رەخنەی کۆمەڵگاوە.

 

رێگەچارەکان: هۆشیاریی و سکاڵا تۆمارکردن

 

موقەدەم عەلی جەمال قەدوری جەختی لەوە کردەوە کە پێویستە ژنان له‌كاتى بونى هه‌ڕه‌شه‌ له‌سه‌ریان، نەکەونە ژێر کاریگەری هەڕەشەكانه‌وه‌ و راستەوخۆ لە بەشی تاوانە ئەلیکترۆنییەکان لە بەڕێوەبەرایەتی پۆلیسی گەرمیان سکاڵا تۆماربکەن، چونکە به‌وته‌ى خۆی "لێکۆڵینەوە لە کەیسەکانیان دەکرێت".

 

لایەنە پەیوەندیدارەکان هاوڕان لەسەر ئەوەی کە دیاردەی توندوتیژی ئەلیکترۆنی بەتەواوی بنبڕ ناکرێت و رێگەچارەیەکی هەمیشەیی نییە، بەڵام موژدە محەمەد چەند پێشنیازێکی خستەڕو بۆ کەمکردنەوەی دیاردەکە، وەک: بڵاوکردنەوەی هۆشیاری خێزانی و کۆمەڵایەتی، هه‌روه‌ها لە هەمان کاتدا هۆشیارکردنەوەی ژنان و پیاوان.

 

وتەبێژی پۆلیسی گەرمیان جەختی لەوە کردەوە کە تاوان هەمیشە بەردەوامی هەیە و تاوانباران شێواز و میکانیزمی نوێ دەگرنەبەر بۆ ڕزگاربون لە دادگا، بەڵام به‌وته‌ى خۆی ئه‌وان وه‌كو پۆلیس بە بەردەوامی لە هەوڵی بەرزکردنەوەی ئاستی تواناکانیانن بۆ روبەڕوبونەوەی تاوانە نوێیەکان و لێکۆڵینەوە لە تاوانباران.