رادیۆی دەنگ- هونەر ئەحمەد

 

لەدەشتاییەکانی گەرمیاندا، خولیایەکی دێرین لە نوێبونەوەدایە، خولیای ئەسپسواریی. توانا حسێن، لاوێکی پڕ لە وزە، مەشخەڵی ئەم خولیایەی هەڵگرتوە و لە یەکێک لە فێرگەکانی ئەسپسواریی، خەڵکی فێری ئەم هونەرە دەکات.

 

توانا حسێن بە گەرموگوڕییەوە باس لە فێرگەکەیان دەکات و دەڵێت: "چەند ساڵێکە فێرگەی ئەسپسواریمان هەیە و ئەسپ و ماینمان هەیە، ئەم خولیایەی ئەسپسواری هەر لە باو و باپیرانمانەوە بۆمان ماوەتەوە".

 

دەشڵێت: ماوەی 10 ساڵێکە ئەسپسواریی دەکەم و نزیکەی سێ ساڵیش دەبێت فێرگەکەمان کردوەتەوە.

 

ئەو باس لە گەشەسەندنی بەرچاوی فێرگەکە دەکات و دەڵێت: "ئێستا خەڵکێکی زۆر سەردان دەکەن و خەڵکێکی زۆر فێری ئەسپسواریی بون لە رێگەی ئێمەوە".

 

 

کۆمەڵێک ئەسپی راهێنراو بۆ هەمو ئاستەکان

 

فێرگەکەی توانا خاوەنی کۆمەڵێک ئەسپی جۆراوجۆرە. دەڵێت: "ئەسپ و ماینمان زۆرە، کوردی هەیە و عەرەبیش هەیە، ئەسپی راهێنراومان هەیە کە بۆ فێرکردنە و پێیان دەڵێین 'ئەسپی عەجول'. هەروەها ئەسپ و ماینیشمان هەیە کە فەقیرن (تازەپێگەیشتو یان کەم ئەزمون)، ئەوانەی کە دێنە لامان سەرەتا 'ئەسپی فەقیریان' بۆ بەکاردەهێنین تاوەکو رادێن، رێنماییەکانیان هەموی پێدەدەین کە چۆن ئەسپ بەکاربهێنن و جڵەویان بکەن".

 

 

خۆشەویستیی و پابەندییەکی بەردەوام

 

توانا حسێن باس لە پابەندبونی خۆی و خێزانەکەی بەم پیشەیە دەکات: "خۆم لە سەرەتاوە بە هەمانشێوە لەگەڵ باوکم وا فێربوم و ئەسپم بەکارهێناوە. ماوەی سێ ساڵە بە بەردەوامی بەیانی تاوەکو ئێوارە لە فێرگەکەین، شەوانیش چاودێریی ئەسپەکان دەکەین و بە بەردەوامی پاکیان دەکەینەوە و تەنانەت پزیشکی تایبەتیشمان بۆ ئەسپەکان داناوە".

 

وەک توانا باسیدەکات، بەشێک لە ئەسپەکانی فێرگەکە لە ئێرانەوە هێنراون، بەشێکی دیکەشیان لە شوێنە جیاوازەکان کڕیویانە.

 

ئەسپە سەرەتاییەکانیش کە بۆ فێرکردن بەکاردەهێنرێن، ئەسپی فێرکراون و دواتر زیاتر رادەهێنرێن بۆ مەبەستی دەرچون و شارەزایی زیاتر.

 

 

ئەسپسواری، بەبێ سنوری تەمەن و ترس

 

یەکێک لە خاڵە سەرنجڕاکێشەکان ئەوەیە کە فێربونی ئەسپسواریی بە تەمەنەوە بەند نییە.

 

توانا حسێن دەڵێت: "کەسی 12 ساڵمان هەیە بە تەنیا سواریی دەکات بەبێ هیچ کەسێک، بە پێچەوانەوە کەسیش هەیە تەمەنی گەورەیە و فێری سواریی نەبوە".

 

سەبارەت بە ترسی ئەسپسواریی، توانا دڵنیایی دەدات و دەڵێت: "هیچ ترسێکی ناوێت، گوێڕایەڵی راهێنەرەکان بن، فێردەبن".

 

 

پلانی داهاتو: بەشداریکردن لە ڤیستیڤاڵەکان

 

توانا ئومێدی ئەوە دەخوازێت کە لە داهاتودا فێرگەکەیان بتوانێت بەشداری ڤیستیڤاڵی ئەسپسواری بکات، ئەگەر لە سنورەکەدا بکرێتەوە.

 

لە کۆتاییشدا بە سادەییەوە دەڵێت: "ئەسپسواریی خولیایە، حەزت لێی هەبێت فێر دەبیت".