دەنگ نێت

 

بەهۆی بونی کێشە و ئاڵۆزییەوە، هەڵبژاردنی ئەنجومەنی کارگێڕیی لقی ٢٢ـی گەرمیانی پارتی دیموکراتی کوردستان لە بارەگای لقەکە لە کەلار ئەنجام نادرێت و دەبرێتە هەولێر.

 

بەپێی زانیارییەکانی رادیۆی دەنگ، بڕیارە سبەینێ هەڵبژاردنی ئەنجومەنی کارگێڕیی لقی ٢٢ـی گەرمیانی پارتی دیموکراتی کوردستان، لە بارەگای سەرکردایەتی کەرکوک/ گەرمیانی ئەو حزبە لە هەولێر ئەنجام بدرێت لە بری ئەنجامدانی لە بارەگای لق لە قەزای کەلار.

 

هەر بەپێی زانیارییەکان، ئەنجامدانی هەڵبژاردنی ئەنجومەنی کارگێڕیی لقی گەرمیان لە هەولێر، بەهۆی بونی شەڕ و ئاڵۆزیی و کێشەوە بوە کەوایکردوە نەتوانرێت تائێستا ئەنجام بدرێت، هەربۆیە بە بڕیاری لیژنەی باڵای هەڵبژاردنی سنورەکە، شوێنی ئەنجامدانی گوازراوەتەوە بۆ هەولێر و بڕیارە سبەی ئەو (٥٧) کادیرەی مافی دەنگدانیان هەیە بۆ ئەنجومەنی کارگێڕیی لق، بچنە بارەگای سەرکردایەتی کەرکوک/ گەرمیان لە هەولێر و لەوێ دەنگ بدەن.

 

زانیارییەکان ئاماژە بەوەشدەکەن، هێشتا گرنتی نییە سبەی هەڵبژاردنەکە بەڕێوەدەچێت، بەهۆی ئەگەری تەواونەبونی نیساب، چونکە بەشێک لە کادیرەکان نیگەرانن لە پرۆسەکە و دەیانەوێت بەشداریی نەکەن.

 

هەڵبژاردنی ناوخۆیی پارتی دیموکراتی کوردستان لە سنوری لقی گەرمیان، ئاڵۆزیی جۆراوجۆری بەخۆیەوە بینی، کە بوە هۆی پەکخستنی هەڵبژاردنەکە لە زۆر ناوچەی ئەو حزبەدا و هەروەک دواخستنی هەڵبژاردنی ئەنجومەنی کارگێڕیی لقەکە.

 

لەم لینکەوە راپۆرتێکی پێشوی دەنگ لەبارەی ئەو ناکۆکییانە بخوێنەرەوە.