دەنگ نێت 

 

دوای وەرگەڕانی تانکەرێک و گڕگرتنی لەدەربەندیخان، شۆفێرەکەی بە سەختی برینداربوە، هاوکات بەهۆی روداوەکەشەوە ئاو و کارەبای قەزاکە بڕاوە.

 

پشتیوان عابد، بەڕێوبەری بەڕێوبەرێتی هاتوچۆی دەربەندیخان، بە رادیۆی دەنگی وت: پێشنیوەڕۆی ئەمڕۆ هەینی، تانکەرێکی گواستنەوەی سوتەمەنی لە پاش دەرچونی لە تونێلی دەربەندیخان بە ئاراستەی ناوشار، کۆنترۆڵی لەدەستداوە و وەرگەڕا، بەوهۆیەوە تانکەرەکە گڕی گرت و ئاگرێکی گەورە ئەو دەوروبەرەی گرتەوە و زیانێکی زۆری بەدوای خۆیدا هێنا و رێژەیەکی زۆر دار و سەوزایی لەناو بردوە.

 

لەبارەی زیانی گیانیشەوە، وتی: تەنها شۆفێری تانکەرەکە لە روداوەکەدا برینداربوە و بەشێکی جەستەی سوتاوە و دۆخی ناجێگیرە.

 

ئاماژەی بەوەشدا روداوەکە ئاو و کارەبای دەربەندیخانی بڕیوە.

 

لەبارەی وەستانی هاتوچۆشەوە، وتی: ئێستا سایدێکی رێگاکەمان کردوەتەوە بۆ هاتن و رۆشتن بۆ ئۆتۆمبێلی بچوک، جگە لە تەنکەرەکان تەواوی بارهەڵگریش لەسەر شاخەوە دەڕۆن، تەنکەرەکانمان گلداوەتەوە و تا کاتژمێرێکی دیکە رێگەکە ئاسایی دەبێتەوە.