دەنگ نێت

 

لقی گەرمیانی سەندیکای کرێکارانی کوردستان بەتۆمەتی ناوزڕاندن سکاڵا لەسەر بەرپرسی یاسایی شارەوانی کەلار تۆمار دەکات، بەرپرسەکەی شارەوانیش دەڵێت: ناوی سەندیکام نەزڕاندوە، بەڵام هەندێک کەس نەشیاون لەوێ.

 

عەدنان محەمەد، سەرۆکی لقی گەرمیانی سەندیکاکانی کرێکاران و پیشەوەرانی کوردستان، بۆ رادیۆی دەنگ وتی: لە فەیسبوک کاک عەباس کە بەرپرسی بەشی یاساییە لە سەرۆکایەتی شارەوانی کەلار، پۆستێکی کردوە لەسەر سەندیکاکەمان و لۆگۆی سەندیکاکەمانی بەکارهێناوە بەجۆرێک لە جۆرەکان تەشهیر و ناوزڕاندن بە سەندیکاکەمان دەکات.

 

وتیشی: بەبێ ئەوەی ئاگادار بێت تاچەند کارمان کردوە لە بەرژەوەندی کرێکاران و بەدواداچونکردنمان بۆ ماف و گرفتی کرێکاران و کاسبکاران، بەڵام ئەو جۆرێک لە تەشهیر و ناوزڕاندن دەکات و بە گاڵتە ئامێزانە باس لە سەندیکاکەمان دەکات.

 

بەوتەی سەرۆکی لقی گەرمیانی سەندیکای کرێکاران، سکاڵاکە دوای کۆبونەوە لەگەڵ ستافی لقەکەیان تۆمارکراوە و دادگاش فەرمانی دەستگیرکردنی بۆ دەرکردوە.

 

لەبەرامبەریشدا عەباس حسێن، بەرپرسی بەشی یاسایی لە سەرۆکایەتی شارەوانی کەلار، بە رادیۆی دەنگی وت: تەشهیرم نەکردوە، ئەسڵەن سەندیکای کرێکاران قوربانییە.

 

وتیشی: سەندیکای کرێکاران، سەندیکای حەقیقیی کرێکارانە، بەڵام هەندێک کەس دانراون لەو شوێنە کە نەشیاون.