دەنگ نێت

 

بۆ جاری سێیەمە تەندرەین بۆ سێ پرۆژە لەسنوری گەرمیاندا دەکرێت، بەڵام تاوەکو ئێستا هیج بەڵێندەرێک وەرینەگرتوە، ئیدارەی گەرمیانیش هۆکارەکەی دەگەڕێنێتەوە بۆ قەیرانی دارایی و نەبونی پارەی نەختینە.

 

ماڵپەڕی ئیدارەی گەرمیان بۆ جاری سێیەم کەمکردنەوەی سنورداری بۆ ئەم پرۆژانە راگەیاند:

١. پرۆژەی راکێشانى بۆڕى ئاو لە گوندى چیاسورخەوە بۆ گوندەکانى شێخ فەیزوڵڵا، بەردى عەلی سەرو و بەردى عەلی خوارو.

٢. پرۆژەی راکێشانی بۆری ئاو بۆ گەڕەکی ئەوبەری لە قەزای کفری و راکێشانی تۆڕی ئاو بۆ گەڕەکی ڕاپەڕین لە ناحیەی رزگاریی.

٣. پرۆژەی ئاوی گوندی بنەکە لە ناحیەی ئاوەسپی و لێدانی بیری قوڵ و دانانی تانکی ئاو و راکێشانی تۆڕی ئاو بۆ گوندی بنەکە.

 

چۆمان ئەحمەد، بەرپرسی راگەیاندن و پەیوەندیەکانی ئیدارەی گەرمیان، بۆ رادیۆی دەنگ وتی: بەپێی یاسا و رێنماییەکان، تەندەری پرۆژەکان بۆ جاری یەکەم بانگەوازی بۆ دەکرێت، ئەگەر هیچ بەڵێندەرێک نەهاتە پێشەوە، بۆ جاری دوەم بانگەوازی بۆ ئەکەی، ئەگەر ئەوەش بەڵێندەری بۆ نەهاتەپێش جارێکی تر بانگەوازی بۆ دەکرێت.

 

وتیشی: ئێمە رێکارە یاساییەکەمان بۆ کردوە، بە پرۆسەی تەندەرین تێپەڕدەبێت، بەڵام ئەوەی بەڵێندەر وەریناگرێت لای خۆیەتی.  

 

بەوتەی بەرپرسی راگەیاندن و پەیوەندیەکانی ئیدارەی گەرمیان: ئەوەی بەئێمەیان وتوە لە رابردودا بەهۆکاری قەیرانی دارایی و نەبونی پارەی نەختینەوە، بەڵێندەر و کۆمپانیاکان کەمتر دێنە پێشەوە بۆ وەرگرتنی پرۆژەکان.