دەنگ نێت

 

دواى 10 ساڵ بڕیاردان له‌ تاپۆكردنى ناحیه‌ى باوه‌نور، به‌ڵام تاوه‌كو ئێستا تاپۆ نه‌كراوه‌، به‌ڕێوبه‌رى تاپۆى گه‌رمیانیش ده‌ڵێت: هیچ مامه‌ڵه‌یه‌كى تاپۆكردنى ئه‌و ناحیه‌یه‌ نه‌هاتوه‌ته‌ لاى ئێمه‌.

 

ئه‌كره‌م ره‌زا، به‌ڕێوبه‌رى بەڕێوبەرایەتی تۆماری خانوبەرەی "تاپۆى" گه‌رمیان، بۆ رادیۆى ده‌نگ باسى له‌وه‌كرد: تاوه‌كو ئێستا هیچ مامه‌ڵه‌یه‌كى تۆماركردنى ناحیه‌ى باوه‌نور نه‌هاتوه‌ته‌ لاى ئێمه‌ له‌لایه‌ن شاره‌وانى ناحیه‌كه‌وه‌.

 

وتیشى: له‌گه‌ڵ به‌ڕێوبه‌رى شاره‌وانیه‌كانى گه‌رمیان و سه‌رۆكى شاره‌وانى ناحیه‌كه‌ش گفتوگۆمان كردوه‌ هه‌ر مامه‌ڵه‌یه‌كیان بێته‌لاى ئێمه‌ ئه‌وه‌ راسته‌وخۆ بۆیان رایی ده‌كرێت، به‌ڵام تاوه‌كو ئێستا هیچ نه‌هاتوه‌.

 

هێماى بۆ ئه‌وه‌شكرد: ئه‌گه‌ر نوێنه‌ریان بوێت راسته‌وخۆ پێیان ده‌ده‌ین، به‌ڵام تاوه‌كو ئێستا داواى ئه‌وه‌شیان نه‌كردوه‌.

 

لایخۆشیەوە سەرۆکی شارەوانی باوەنور، هۆکاری حاڵەتەکە دەگەڕێنێتەوە بۆ نەبونی نەخشەی ناحیەکەیان.

 

وه‌حید یوسف، بۆ رادیۆى ده‌نگ وتى: سه‌باره‌ت به‌ پرسى تاپۆى ناحیه‌كه‌ له‌گه‌ڵ به‌ڕێوبه‌رایه‌تى تاپۆ قسه‌مان كردوه‌، به‌ڵام به‌هۆى نه‌بونى نه‌خشه‌ى په‌سه‌ندكراوه‌ و نه‌مانتوانیوه‌ كارى له‌سه‌ر بكه‌ین، چونكه‌ تاپۆى گه‌رمیان پێیان وتوین ئه‌گه‌ر خانوه‌كان ژماره‌یان نه‌بێت ناتوانین كارى له‌سه‌ر بكه‌ین.

 

ده‌شڵێت: هاوڵاتى عه‌ریزه‌ى داوه‌ و مامه‌ڵه‌شیان بۆكراوە،‌ ئه‌وه‌ى په‌یوه‌ندى به‌ ئێمه‌وه‌ بێت هه‌موى ئاماده‌یه‌، به‌ڵام به‌هۆى نه‌بونى نه‌خشه‌كه‌وه‌ كاره‌كان وه‌ستاوه‌، ئه‌گه‌ر نه‌خشه‌كه‌ ته‌وا بكرێت و په‌سه‌ند بكرێت ئه‌وكات ده‌ست به‌ تۆمارکردنیان ده‌كه‌ین.