دەنگ نێت

 

سەرۆکی شارەوانی رزگاریی دەڵێت: لە ئێستادا ناحیەکە تاڕادەیەک لە مەترسی لافاو دەرچوە.

 

لەماوەکانی رابردودا دەستەی پاڵپشتیی ناحیەی رزگاریی، داوایکرد ئەو کەسانەی شۆفڵیان هەیە بەدەمیانەوە بێن و بەشدارییبکەن لە چاککردن و قایمکردنی بەربەستەکانی لافاو، ئەمەش بەهۆی نەبونی  ئامێری پێویست لەشارەوانی ناحیەکە.

 

ئەرسەلان ئەحمەد، سەرۆکی شارەوانی رزگاریی، بۆ رادیۆی دەنگ وتی: بەپێی پەیوەندیمان لەگەڵ هاوڕێیانی شارەزاری کەشوهەوا، ئەم شەپۆلەی کە دێت رەنگە ئەوەندە بەهێز نەبێت کە مەترسیی دروستبکات لەسەر ناحیەکە.

 

وتیشی: بەربەستەکانی لافاوی ناحیەکەمان بە ئامێرەکانی خۆمان کارمان تێداکردوە و تاڕادەیەک ناحیەکە لەمەترسی ئەو شەپۆلە لافاوە دەرچوە، هەروەها لەگەڵ گروپێکدا قسەمان کردوە کە هیمەتێک بکەین بۆ چارەسەری کۆتایی و ئەگەر بێن بەدەم داواکاریەکەمانەوە، چیتر پێویست ناکات هەمو ساڵێک بەربەستی لافاو قایم بکرێت.