دەنگ نێت

 

بەڕێوبەری به‌نداوى باوه‌شاسوار له‌ قه‌زاى كفرى دەڵێت: ٣ بۆ ٥ مەتر قوڕولیتە لە بنی بەنداوەکە کۆبوەتەوە، بەوپێیەی نزیکەی ١٢ ساڵە بەنداوەکە پاکنەکراوەتەوە.

 

عه‌زیز كه‌ریم، بۆ رادیۆى ده‌نگ وتى: به‌نداوى باوه‌شاسوار له‌ ساڵى ٢٠١٢ دروستكراوه‌، بۆماوه‌ى نزیکەی ١٢ ساڵه‌ تاوه‌كو ئێستا به‌نداوه‌كه‌ پاك نه‌كراوه‌ته‌وه‌، سه‌ربارى ئه‌و هه‌مو قوڕولیته‌یه‌ی كه‌ له‌ چه‌مه‌كانه‌وه به‌هۆى بارانبارینه‌وه‌ دێته‌ ناوبه‌نداوه‌كه‌ ‌و بن ده‌نێته‌وه‌.

 

وتیشى: له‌ ئێستادا ٣ بۆ ٥ مه‌تر قوڕولیته‌ له‌ بنی به‌نداوه‌كه‌دا كۆبوه‌ته‌وه‌، هیچ ئامێر و پێداویستیه‌كمان نیه‌ بۆ ئه‌وه‌ى پاكى بكه‌ینه‌وه‌، چونكه‌ بودجه‌یه‌كى زۆرى پێویسته‌‌.

 

هێماى بۆ ئه‌وه‌شكرد: له‌ سه‌ره‌تاى دروستكردنى به‌نداوه‌كه‌ بۆ خۆى تواناى گلدانه‌وه‌ى ٦ ملیۆن مه‌تر سێجا ئاوى هه‌یه‌، به‌ڵام به‌هۆى كۆبونه‌وه‌ى ئه‌و  قۆڕولیتانه‌ى كه‌ هه‌یه‌ له‌ ئێستادا ته‌نها ٥ ملیۆن و ٣٠٠ هه‌زار مه‌تر سێجا ئاو ده‌گرێت، واتا نزیكه‌ى ٧٠٠ هه‌زار مه‌تر سێجا كه‌متر ئاو گلده‌داته‌وه‌.