دەنگ نێت

 

لەبارەی گرانبونی نرخی گۆشتی سور لە بازاڕەکانی گەرمیان، به‌ڕێوبه‌رى چاودێریی بازرگانى گه‌رمیان ده‌ڵێت: بەوهۆیەوەیە کە هاورده‌كردنى ئاژه‌ڵ بۆ سنوره‌كه‌ كه‌مبوه‌ته‌وه‌.

 

چەند رۆژێکە نرخی گۆشتی سور بە رادەیەکی بەرچاو بەرزبوەتەوە و کیلۆی گەیشتوە بە ٢١-٢٢ هەزار.

 

لەبارەی ئەم بەرزبونەوەیە، حیكمه‌ت ئه‌حمه‌د، به‌ڕێوبه‌رى به‌ڕێوبه‌رایه‌تى چاودێریی بازرگانى گه‌رمیان، بۆ رادیۆى ده‌نگ باسى له‌وه‌كرد: هۆكارى به‌رزى نرخى گۆشت له‌ بازاڕدا بۆ ئه‌وه‌ ده‌گه‌رێته‌وه‌ كه‌ له‌ مه‌یدانى ئاژه‌ڵان نرخ به‌رزبوه‌ته‌وه‌ و هه‌ر كیلۆیه‌ك لەو مەیدانانەدا 10 هه‌زار دیناره‌.

 

وتیشى: هاوكات گۆشتى سور له‌ بازاڕدا وەک هەمو کەرەستەیەکی تر پەیوەستە بە خواست و خستنەڕو "عرض و طلب"،‌ كه‌ خواست زۆربو و گۆشت كه‌مبو، ئه‌وه‌ نرخ به‌رز ده‌بێته‌وه‌، به‌ پێچه‌وانه‌شه‌وه‌ هه‌ر راسته‌.

 

هێماى بۆ ئه‌وه‌شكرد: یه‌كێكى دیكه‌ له‌ هۆكاره‌كان كه‌مبونه‌وه‌ى هاورده‌كردنى ئاژه‌ڵه‌ له‌ وڵاتانى دیکەوە ‌ بۆ سنوره‌كه‌، ئه‌مه‌ش وایكردوه‌ نرخ به‌رزببێته‌وه‌، بۆ نمونه‌ وڵاتى ئێران رێگه‌ نادات ئاژه‌ڵ بێته‌ سنوره‌كه‌ و باجێكى زۆرى خستوه‌ته‌سه‌رى.