دەنگ نێت

 

دوای ئەوەی وا بڵاوکرایەوە کە دیوەخانی عەشیرەتی تیلەکۆییەکان لە کەلار تێکدراوە، سەرچاوەیەک دەڵێت فەرمانی دادگا بۆ تێکدانیان هەیە، سەرۆکی عەشیرەتی تیلەکۆیەکان دەڵێت: تاپۆی ئەو شوێنە بەناوی منەوەیە، نازانم لەسەر چ بنەمایەک ئەم قسانە دەکرێت.

 

لە ئێوارەی ئەمڕۆوە دەنگۆی ئەوەبڵاوبوەتەوە کە بە فەرمانی بافڵ تاڵەبانی- سەرۆکی یەکێتی نیشتمانی کوردستان، باخێکی فەرهاد رەفعەت، کە سەرۆکی عەشرەتی تیلەکۆییە و کردویەتی بە دیوەخانی عەشیرەتەکەیان، تێکدەدرێت.

 

لەوبارەوە فەرهاد رەفعەت، بە رادیۆی دەنگی راگەیاند: ئەمە دیوەخانی هەمو گەرمیانە، هی هەمو یەکێتی نیشتیمانی کوردستانە، بارەگایەکیشە بۆ بانگەشەی هەڵبژاردن بۆ ئەو حیزبە، تەنها هی تیلەکۆ نییە. 

 

وتیشی: من ئەفسەرێکی عێراقم و کادری یەکێتی نیشتیمانی کوردستانم، هەر بڕیارێک هەبێت خۆم پێش هەموی جێبەجێی دەکەم.

 

 دەشڵێت: هیچ بڕیارێکی وا نەهاتوە نە لە سەرۆکی یەکێتیەوە، نە لە دادگاوە، تاپۆکەی بەناوی خۆمەوەیە، نازانم ئەم قسانە لەسەر چ بنەمایەک دەکرێت.

 

ئەوەی ناونراوە دیوەخانی عەشیرەتی تیلەکۆیەکان، لەبنەڕەتدا چەند باخێکن نزیک بە بینای مەڵبەندی گەرمیانی یەکێتی نیشتیمانی کوردستان لە کەلار.

 

بەپێی زانیارییەکانی رادیۆی دەنگ، ئەو باخانە بە نایاسایی زانراون و دۆسیەکەیان پێش چەند ساڵێک دراوە بەدادگا، بەوتەی سەرچاوەیەکیش، دادگا ئێستا بڕیاری تێکدانی داون.

 

بەڵام فەرهاد رەفعەت رەتیکردەوە هیچ بڕیارێکیان لەوبارەوە پێ گەیشتبێت.