دەنگ نێت

 

به‌ڕێوبه‌رى گشتی وەبه‌رهێنانى گه‌رمیان ده‌ڵێت: تاوه‌كو ساڵى ٢٠٣٠ هیچ داواكارییه‌كى پرۆژه‌ نیشته‌جێبون له‌ سنوره‌كه‌ وه‌رناگرین، چونكه‌ ئه‌و‌ پرۆژانەی کە دروستکراون هەتا ئەوکاتە بەشی ناوچەکە دەکات.

 

هونه‌ر مه‌حمود، بە رادیۆى ده‌نگی وت: له‌مساڵدا پلانمان هه‌یه‌ هیچ داواكارییه‌كى پرۆژه‌ى نیشته‌جێبون وه‌رنه‌گرین، چونكه‌ ئەو ٢٥ پرۆژەیەی کە لەئێستادا دروستدەکرێن، بۆ سنورەکە کافییە.

 

رونیکردەوە: به‌پێى ئه‌و ئاماره‌ى به‌رده‌ستمانه‌  ژمارەی دانیشتوانی کەلار ٤٠٠ هەزار کەسە و رێژه‌ى زیادكردنى دانیشتوانیش ساڵانه‌ ٢ بۆ ٣٪ـە‌، بەمپێیەش تاوه‌كو ئه‌و ٢٥ پرۆژەیە هەمویان تەواو دەبن، ئه‌وه‌ ١٢٠ هه‌زار كه‌س لە سنورەکە زیاد ده‌كەن کە دەکاتە ٢٥ هه‌زار خێزان.

 

وتیشی: لەم سۆنگەیەشەوە‌ تاوه‌كو ساڵى ٢٠٢٩ بۆ ٢٠٣٠ هیچ مۆڵه‌تێك به‌ پرۆژه‌ى نیشته‌جێبون ناده‌ین، چونکە ناوچەکە پێویستیی پێنابێت.

 

جه‌ختى له‌وه‌شكرده‌وه‌: له‌برى پرۆژەی دروستکردنی یه‌كه‌ى نیشته‌جێبون، ئه‌وه‌ په‌ره‌ به‌ پرۆژه‌كانى تر ده‌ده‌ین له‌ سێكته‌ره‌كانى وه‌ك: پیشه‌سازیی و گه‌شتیاریی و كشتوكاڵیی، بۆیه‌ ئه‌و وه‌به‌رهێنه‌رانه‌ى كه دێنه‌ ئێره‌، ئه‌و پرۆژانه‌یان دەخەینەبەردەست كه‌ له‌و بوارانه‌دان.