دەنگ نێت

 

دوای ئەوەی گەڕێنرانەوە بۆ مامۆستایی، بەشێک لە راهێنەرە پەروەردەییەکانی گەرمیان نامەی دەستلەکاردەکێشانەوە دەدەنە وەزارەتی پەروەردە.

 

شادمان حەمە ساڵح، راهێنەری پەروەردەیی لە گەرمیان، بۆ رادیۆی دەنگ وتی: هۆکاری دەستلەکارکێشانەوەمان بۆ ئەوە دەگەڕێتەوە کۆمەڵێک رێکار گیراوەتەبەر بەرامبەرمان بەدەرە لە یاسا و رێنماییەکان، لەوانەش گەڕانەوەمان بۆ پیشەی مامۆستایی.

 

بەپێی نوسراوێکی وەزارەتی پەروەردە، بڕیاردراوە راهێنەرانی پەروەردە لە سنوری گەرمیان بگەڕێنرێنەوە بۆ پیشەی مامۆستایی، ئەم بڕیارەش بەڕای شادمان حەمەساڵح، لە کاردانەوەی بەشدارییکردنیانە لە بایکۆت و خۆپیشاندانی چەند مانگی رابردو.

 

بەوتەی ئەو، لە سنوری گەرمیان ٢٥ راهێنەری پەروەردەیی هەن، بەڵام ژمارەی ئەوانەی دەستیان لەکارکێشاوەتەوە، کەمن و ئامادەش نەبو ژمارەیان ئاشکرابکات.

 

هێمای بۆ ئەوەشکرد: بەشێک لە راهێنەرەکانمان کە ئێستا کراونەتەوە بە مامۆستا، ماستەریان هەیە، لەکاتێکدا بەپێی یاسا و رێنماییەکانی وەزارەت نابێت ئەوانەی ماستەریان هەیە لە بنەڕەتی وانە بڵێنەوە، کەچی هەندێکیان نێردراونەتەوە بۆ قوتابخانەی بنەڕەتیی و تەنانەت بۆ لادێکانیش.

 

لایخۆشیەوە، هەردی عەباس، یەکێکی تر لە راهێنەرە دەستلەکارکێشاوەکان، بۆ رادیۆی دەنگ وتی: هۆکارێکی دیکەی دەستلەکارکێشانەوەمان، بەخشین و دورخستنەوەی دو راهێنەرە لەسنوری پەروەردەی گەرمیان بە یەکجاریی.

 

وتیشی: بەگشتی تێبینیمان لەسەر شێوازی گواستنەوەی راهێنەران هەیە و شێوازێکی نەگونجاوە و هیچ یەکێک لە ڕاهێنەران ئاگادار نەکراوەتەوە.

 

رونیکردەوە: ئەوان بیانوەکەیان ئەوەیە پێویستیان بە راژەکەیانە، بەڵام لە گواستنەوەکەدا هیچ پێویستیەک بە راژە رەنگی نەداوەتەوە.