دەنگ نێت

 

١٣ کەس (سی-ڤی)ـیان پێشکەش کردوە بۆ وەرگرتنی پۆستی جێگری سەرپەرشتیاری ئیدارەی گەرمیان، سەرۆکی رێکخراوی پاڵپشتی کفریش دەڵێت: مەرجە ئەو کەسەی پۆستەکە وەردەگرێت، خەڵکی قەزای کفری بێت.

 

عوسمان قەتارچی، سەرۆکی رێکخراوی پاڵپشتی کفری بە رادیۆی دەنگی راگەیاند: یەکێک لەو ۲٦ خاڵەی کە داوامان کرد لەکاتی مانگرتنەکەی کفری، ئەوەبو پۆستی جێگری سەرپەرشتیاری ئیدارەی گەرمیان بەر کفری بکەوێت و بدرێت بەکەسێک کە خەڵکی کفری و دانیشتوی شارەکە بێت.

 

وتیشی: چونکە ئەو ئەزمونەمان هەیە کە کەسێک خەڵکی کفری نەبێت، بەشی پێویست لە کێشەوگرفتەکانی خەڵکی ناوچەکە تێناگات و ناتوانێت خزمەت بە شارەکە بکات.  

 

لەبارەی ئەوەی چەند کەس خۆی کاندید کردوە بۆ پۆستەکە، سەرۆکی رێکخراوی پاڵپشتی کفری دەڵێت: نزیکەی ۱۳ کەس (سی-ڤی)ـیان پێشکەش کردوە.

 

پۆستی جێگری سەرپەرشتیاری ئیدارەی گەرمیان لە پشکی یەکێتی نیشتیمانی کوردستانە و پێشتر لەلایەن سروە محەمەدـەوە  بەڕێوە دەبرا، بەڵام لەدوای هەڵبژاردنی ناوبراو بە ئەندامی ئەنجومەنی نوێنەرانی عێراق، نزیکەی دو ساڵە پۆستەکە بەبەتاڵیی ماوەتەوە.