دەنگ نێت

 

لەناحیەی نەوجولـی ئیدارەی گەرمیان، تەقە لە ٦ راوچی کراوە و دانەیەکیان کوژراوە، بەڕێوبەری ناحیەکەش جەخت لەوە دەکاتەوە کە ئەگەر لەناو خۆیاندا بەشەڕ نەهاتبن، ئەوا داعش پەلاماری داون، وتەبێژی پۆلیسی گەرمیانیش دەڵێت: دەستگیرکراوەکان پۆلیسی دارستان بەوە تۆمەتباردەکەن کە تەقەیان لێکردون.

 

چەند هاوڵاتی لەسنوری ناحیەی "زینانە" نەوجولی سەر بەقەزای کفری بەرادیۆی دەنگیان راگەیاند: درەنگانی شەوی رابردو، چەند هاوڵاتییەک لەکاتی سەرقاڵی بونیان بە راوکردن تەقەیان لێکراوە و دانەیەکیان کوژراوە و یەکێکی تریان برینداربوە، دوای روداوەکەش چوار کەسی دیکەیان لەلایەن هێزە ئەمنییەکانەوە دەستگیر کراون. 

 

لەبارەی ئەوەی روداوەکە چۆن بوە و کێ تەقەی لەو راوچیانە کردوە؟ وەهاب ئەحمەد- بەڕێوبەری ناحیەی نەوجول بۆ رادیۆی دەنگ وتی: نازانرێت کێ تەقەی کردوە، هیچ یەکێک لە هێزەکانی حکومەتی هەرێم نەبون، بەڵام گومان دەکرێت ئەو شەش راوچیە یان لەنێوان خۆیان بەشەڕ هاتبن، یان داعش پەلاماری دابن.

 

وتەی وەهاب ئەحمەد، وتیشی: ۲ جار تەقە لە راوچیەکان کراوە، یەکێک لە راوچیەکان کوژراوە و یەکێکی دیکەیان بریندارە، ٤ کەسی دیکەشیان لەلایەن مەفرەزەکانمانەوە دەستگیرکراون بۆ لێکۆڵینەوە.